Տրանսպորտի եւ կապի նախարարության բակում մայիսի 16-ի տեղի ունեցած ծեծկռտուքին մասնակցելու մեջ մեղադրվող Հովհաննես Շմոյանն ու Վազգեն Մկրտչյանն իրենց առաջադրված մեղադրանքը չեն ընդունում: Այս մասին NEWS.am-ի թղթակցին ասաց նրանց պաշտպան Միհրան Պողոսյանը:

«Իմ պաշտպանյալներն ասում են, որ պատահական են տվյալ վայրում հայտնվել: Նրանք իրենց առաջադրված մեղադրանքը չեն ընդունում»,- ասաց Միհրան Պողոսյանը:

Փաստաբանը նշեց նաեւ, որ Շմոյանն ու Մկրտչյանը Տրանսպորտի եւ կապի նախարարության աշխատակիցներ չեն եղել: Այլ մանրամասներ Միհրան Պողոսյանը չհայտնեց՝ նշելով, որ նախաքննություն է ընթանում:

Նշենք, որ սույն քրեական գործի շրջանակներում Վահան Սարգսյանին, Սուրեն Վարդանյանին, Հովհաննես Շմոյանին ու Վազգեն Մկրտչյանին եւս մեկ անձի մեղադրանք է առաջադրվել Քրեական օրենսգրքի 112-րդ հոդվածի 2-րդ մասի 6-րդ կետով: 5-ն էլ կալանավորված են: Ըստ մամուլի հրապարակումների, կալանավորված անձինք նախարար Գագիկ Բեգլարյանի թիկնապահներն ու վարորդն են:

Հիշեցնենք, որ այդ ծեծկռտուքի պատճառով հինգ անձ է տուժել, նրանցից մեկի վիճակը ծանր է:

Երբ եւ ինչու են ձերբակալվել Գագիկ Բեգլարյանի թիկնապահները. մանրամասներ