Այնպիսի թիվ, ինչպիսին Ուկրաինայում հայկական գրքի տպագրության 400-ամյակն է, վկայում է ուկրաինացի եւ հայ ժողովուրդների պատմական մտերմության մասին: Այդ մասին Ուկրաինայի Հայերի միության ներկայացուցիչների հետ հանդիպմանն ասել է Գ. Ս. Սկովորոդայի անվան Փիլիսոփայության ինստիտուտի տնօրեն, Ուկրաինայի Ազգային Ակադեմիայի ակադեմիկոս Միրոսլավ Պոպովիչը, հայտնում է AnalitikaUA.net-ը:
«Հայերը գրքի նկատմամբ հարգանքը եւ սերն անցկացրել են դարերով: Հայտնի է, որ ցնցումների ժամանակներում նրանք նախ եւ առաջ գրքեր են փրկել, այսինքն` գիտելիքներ, որոնք կուտակվել են հազարամյակներով, մշակութային եւ հոգեւոր հարստագույն ժառանգություն», — ընդգծել է Միրոսլավ Պոպովիչը:
Նշենք, որ այս տարի լրանում է Ուկրաինայում հայկական գրատպության 400 տարին: Լվով քաղաքը հայ գրատպության չորրորդ կենտրոնն է դարձել Վենետիկից, Կոստանդնուպոլսից եւ Հռոմից հետո:
Լվովում տպված առաջին գիրքը դարձել է «Դավիթ եւ Սաղմոսը», որը հրապարակվել է 1616-ի դեկտեմբերի 15-ին:
Ուկրաինայում հայ գրատպությանը նվիրված թեմատիկ միջոցառումները մեկնարկել են Կիեւում` մարտի 3-ին (կլոր սեղան), իսկ մարտի 10-ին Կիրովոգրադյան մարզային ունիվերսալ գիտական գրադարանում տեղի է ունեցել Ուկրաինայի Հայերի միության համաժողովը: Մարտի 21-ին Կիեւում, Ուկրաինայի Վ.Ի. Վերնադսկու անվան Ազգային գրադարանում տեղի է ունեցել ցուցահանդես, որը նվիրված էր Ուկրաինայում հայ գրատպության 400-ամյակին:
Հիշեցնենք, որ Ուկրաինայի Հայերի միությունը ակտիվ աշխատանք է կատարում ազգային պատմական արժեքների տարածման ուղղությամբ, Ուկրաինայի Հայերի միության նախագահ Վիլեն Շատվորյանը նշել է, որ գիտությունն ավանդաբար եղել է իրենց կազմակերպության ուշադրության կենտրոնում: