«Անոնիմուսի» ցանցահեններից հայերի համար լավագույն նվերը Թուրքիայում ծպտյալ ապրող հայերի մասին տվյալներն են: Այս մասին ԱՄՆ-ում լույս տեսնող Asbarez թերթում գրում է Կարեն Եղբարյանը: Հոդվածում մասնավորապես ասվում է. «Այդ շարժման որոշ անդամների կալանավորել են մի քանի տարի առաջ, սակայն շարժումը, ինչպես երեւում է, դեռ գործում է: Եվ ահա ես ինձ տղա եմ պատկերացնում, որը Սանտա Կլաուս Անոնիմուսին նամակ է գրում: Միգուցե անիրականանալի է, չէ՞ որ ես երեխա եմ, որը Սանտային նամակ է գրում...
1. Լավագույն նվերն այն հայերի անուններն են, որոնց ծագման ծածկագիրը Թուրքիայում 2-ն է: Ինչպես գիտենք, մոտ 3 տարի առաջ մենք բոլորովին պատահաբար իմացանք, որ Թուրքիան Լոզանի կոնֆերանսից հետո (1923թ.) հետեւում է հույների (1), հայերի (2), հրեաների (3), ասորիների (4) եւ այլ ոչ մուսուլմանների (5) ծագմանը: Պատկերացրեք, թե ինչ հնարավոր կլիներ վերականգնել, եթե ունենայինք այդ տվյալները:
2. Այն թաքստոցների ամբողջական ցուցակը, որտեղ իրենց փողերն էին պահում Հայաստանը կառավարող պլուտոկրատները:
3. Ցեղասպանության ժամանակ Թուրքիայի կառավարության կողմից հայերից խլած սեփականության մասին գրառումները: Այդ տվյալները ժամանակին մի տեղ էին հավաքվել, հետազոտողների կողմից մասամբ վերականգնվել էին:
4. Օսմանյան կայսրության վերջին շրջանի արխիվները, եթե կամ երբ որ դրանք թվայնացվեն: Եվ ոչ միայն կառավարական, այլ նաեւ պետական կազմակերպություններին մոտ մյուս կառույցներինը:
5. Անկարայի եւ նրա լոբբիստների ամբողջ գաղտնի նամակագրությունը, այդ թվում նաեւ ԱՄՆ-ում եւ այլ երկրներում գործող թուրքական խմբերի հետ:
6. Նույնը, ինչ #2, բայց արդեն Ադրբեջանի համար: Այդ գումարով հնարավոր կլիներ վերակառուցել Ղարաբաղը, որը մինչեւ հիմա մինչեւ վերջ չի վերականգնվել Ադրբեջանի ավազակային հարձակումներից՝ էլ չասած ապրիլյան պատերազմի մասին:
7. Ազգային փոքրամասնությունների նկատմամբ խտրական քաղաքականության մասին ցանկացած տեղեկություն:
8. Հայաստանում ԽՍՀՄ փլուզումից հետո քաոտիկ սեփականաշնորհման մասին բոլոր տեղեկությունները:
9. Վրաստանում հայերի դեմ ազգային քաղաքականության մասին բոլոր գաղտնի փաստաթղթերը:
10. Ֆեթուլլահ Գյուլենի շարժման բոլոր գործիչների ցուցակը, այդ թվում՝ դպրոցների, ՀԿ-ների եւ ձեռնարկությունների:
11. Քանի որ արդեն սկսել ենք, եկեք կանգ չառնենք: Ուզում եմ Թուրքիայի հետախուզական ծառայության բոլոր փաստաթղթերի ամբողջական ցուցակը:
Ավելացրեք ձեր ցանկությունները, ինչու՞ մի փոքր չկատակենք: Միգուցե անգամ մենք դուրս գանք լրիվ իրականանալի գաղափարիների վրա»:
