ՀՀ պաշտպանության նախարարի առաջին տեղակալ Դավիթ Տոնոյանը վստահեցնում է, որ գեներալ Մանվել Գրիգորյանի մասնակցությամբ միջադեպի վերաբերյալ հայտարարությունից հետո իրականությունը պարզելու համար աշխատանքներ են տարվում եւ մեղավորները կպատժվեն:
«Ինչը որ մենք լսում ենք լրատվությամբ, ոչ միշտ է համապատասխանում իրականությանը: Իրականությունը պարզելու համար կատարվում են որոշակի աշխատանքներ: Սա ունի հետեւանքներ հասարակության գիտակցության մեջ, դրա համար ավելի լուրջ մոտեցում պետք է ցուցաբերվի: Մեղավորներն անպայման պատժվելու են»,- NEWS.am-ի հետ զրույցում ասաց Դավիթ Տոնոյանը:
Նշենք, որ ԵԿՄ նախագահ, գեներալ Մանվել Գրիգորյանը, որն արդեն վերադարձել է Արցախից, պնդում է, որ իր մասնակցությամբ ոչ մի միջադեպ չի եղել:
Հիշեցնենք, որ Մարտական խաչի ասպետ Վահան Բադասյանն Aravot.am-ի հետ զրույցում նշել էր, որ օրեր առաջ Մանվել Գրիգորյանը Հադրութով անցնելիս կանգնել եւ հայհոյել է զինծառայողներին, որոնք մեքենայով կանգնած են եղել ճանապարհին՝ իրենց իրերը դասավորելու եւ դիրքեր մեկնելու համար: Մանվել Գրիգորյանին զայրացրել է հանգամանքը, թե իր ճանապարհը նեղ է եւ չի կարող շարասյունով անցնել:
Ըստ Բադասյանի՝ Մանվել Գրիգորյանի թիկնապահներն էլ մեքենաներից իջել են եւ սպառնացել զինվորներին: