ՆԱՏՕ-ի Խորհրդարանական Վեհաժողովը (ԽՎ) հռչակագիր է ընդունել, որը կոչ է անում երաշխավորել դաշինքի մեջ մտնող այն երկրների անվտանգությունը, որոնք գտնվում են Ռուսաստանին սահմանակից շրջաններում:
Associated Press գործակալությունը հայտնել է, որ փաստաթուղթը միաձայն հավանության է արժանացել վեհաժողովի` Ալբանիայի մայրաքաղաքում տեղի ունեցած եռօրյա նիստի ընթացքում, որին դաշինքի անդամ եւ ՆԱՏՕ-ի գործընկեր 28 երկրից 250 խորհրդարանական է մասնակցել:
Հռչակագրում ՆԱՏՕ-ի ԽՎ-ն ռազմական բլոկի երկրներին կոչ է անում «երաշխիքներ տրամադրել անդամ երկրներին, որոնք զգում են, որ իրենց անվտանգությունը սպառնալիքի տակ է` ուշադրությունը կենտրոնացնելով դաշինքի արեւելյան եւ հարավային թեւերի վրա»:
Միաժամանակ հռչակագրում ասվում է, որ ՆԱՏՕ-ի երկրները «պետք է շարունակեն ուղիներ փնտրել Ռուսաստանի հետ հարաբերություններում լարվածության թուլացման նպատակով եւ խուսափեն սխալներից եւ միջադեպերից»:
«Ռուսաստանից բխող մարտահրավերը իրական է եւ լուրջ», - պնդում է ՆԱՏՕ-ի ԽՎ-ի նախագահ, ամերիկացի կոնգրեսական Մայքլ Թերները: ՆԱՏՕ-ի գլխավոր քարտուղարի տեղակալ Ալեքսանդր Վերշբոուն, գործակալության տվյալներով, վեհաժողովի նիստին հայտնել է, որ Վարշավայում հուլիսի 8-9-ին տեղի ունենալիք գագաթնաժողովին դաշինքը պետք է որոշում ընդունի իր ռազմական ներուժի եւ Ռուսաստանին սահմանակից երկրներում թիկունքային ապահովման միջոցների ուժեղացման մասին:
Վերշբոուն, նշում է գործակալությունը, ՆԱՏՕ-ի երկրներին նաեւ կոչ է արել իր ռազմական ծախսերն ավելացնել մինչեւ ՀՆԱ-ի 2 տոկոս: ՆԱՏՕ-ի ԽՎ-ի նիստին ընդունված հռչակագրում ասվում է, որ դաշինքի բոլոր երկրները պետք է մինչեւ 2020 թվական հասնեն այդ մակարդակին, հայտնում է ՏԱՍՍ-ը: