ՀՀ քննչական կոմիտեի Երեւանի քննչական վարչության Աջափնյակ եւ Դավթաշեն վարչական շրջանների քննչական բաժնում ավարտվել է քաղաքացուն ծանր մարմնական վնաս պատճառելու դեպքի առթիվ հարուցված քրեական գործի նախաքննությունը: Ինչպես NEWS.am-ը տեղեկանում է ՀՀ Քննչական կոմիտեի մամուլի ծառայությունից,
2016 թվականի ապրիլի 6-ին «Արմենիա» ԲԿ-ից ահազանգ էր ստացվել այն մասին, որ «կրծքավանդակի ձախ կողմնային պատի կտրած-ծակած թափանցող վերքով, ձախ թոքի վնասումով» իրենց մոտ է տեղափոխվել Սերգեյ Աբրահամյանը:
Նախնական քննության տվյալներով՝ տուժող Սերգեյ Աբրահամյանն ու մեղադրյալ Ռ.Կայիլյանը միմյանց ճանաչել են վաղուց. ծանոթացել են «Կոշ» քրեակատարողական հիմնարկում պատիժը կրելու ընթացքում։ Դեպքի օրը՝ 2016 թվականի ապրիլի 6-ին՝ ժամը 16:00-ի սահմաններում, Սերգեյը գնացել է հանդիպելու Ռ.Կայիլյանի հորեղբորը, ում շենքի բակում հանդիպել է Ռ.Կայիլյանին եւ վերջինի ընկերոջը։ Հանդիպման ընթացքում զրուցել են քրեակատարողական հիմնարկում միասին պատիժ կրելու ժամանակահատվածի մասին, որի ընթացքում Սերգեյը վիրավորական արտահայտություններ է հնչեցրել Ռ.Կայիլյանի հասցեին, ինչին ի պատասխան՝ վերջինը նրան հարվածել է:
Ձեռք բերված ապացույցների համաձայն՝ Սերգեյ Աբրահամյանը դիմել է փախուստի, իսկ Ռ.Կայիլյանը հետապնդել է նրան, բռնություն գործադրել նրա նկատմամբ, իր մոտ գտնվող դանակով հարվածել Աբրահամյանի որովայնին եւ դեպքի վայրից դիմել փախուստի, իսկ Ս.Աբրահամյանը «Շտապօգնության» ավտոմեքենայով տեղափոխվել է բժշկական կենտրոն։
Ապացույցների համակցությամբ՝ Ռ.Կայիլյանին մեղադրանք է առաջադրվել՝ ՀՀ քրեական օրենսգրքի 112-րդ հոդվածի 1-ին մասով (դիտավորությամբ ուրիշի առողջությանը ծանր մարմնական վնաս պատճառելը):
Քրեական գործը՝ մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին: