Եվրասիական տնտեսական միության (ԵՏՄ) եւ Պեկինի միջեւ համագործակցության մասին համաձայնագրի վրա աշխատանքը կսկսվի մոտ ժամանակներս` ինտեգրացիոն միավորման անդամ երկրների կողմից համատեղ դիրքորոշման մշակումից հետո: Այդ մասին հայտնել է ՌԴ փոխարտգործնախարար Իգոր Մորգուլովը` պատասխանելով ՏԱՍՍ-ի հարցին:
«ԵՏՄ-ի եւ Չինաստանի միջեւ համագործակցության մասին բանակցային գործընթացը նոր է սկսվում: Այսօր Աստանայում պետք է հաստատվեն ԵՏՄ-ի անդամ երկրների համատեղ դիրքորոշումները Պեկինի հետ բանակցություններ վարելու համար», - ասել է նա:
«Այդ ընդհանուր բանակցված դիրքորոշումից էլ գործընթացը կսկսվի մոտակա ժամանակներս, բայց թե որքան ժամանակ կխլի, դժվար է ասել», - նշել է փոխարտգործնախարարը:
Նախօրեին ՌԴ նախագահի օգնական Ուշակովը հայտնել է, որ ԵԱՏՄ-ի առաջնորդները մայիսի 31-ին կարող են տալ ՉԺՀ-ի հետ առեւտրատնտեսական համաձայնագրի մեկնարկը: Նա հավելել է, որ Չինաստանի հետ համագործակցությունը զրույցի առանձին թեմա կդառնա Եվրասիական տնտեսական խորհրդի առաջնորդների նեղ կազմով նիստին, որն ընթանում է այսօր:
Ավելի վաղ` երեքշաբթի ՌԴ-ի արտգործնախարար Սերգեյ Լավրովը «Ռուսաստան-Չինաստան. Դեպի երկկողմ հարաբերությունների նոր որակ» համաժողովին հայտնել էր, որ սկզբունքային պայմանավորվածություն է ձեռք բերվել եվրասիական ինտեգրացիայի եւ չինական «Մետաքսի ճանապարհի տնտեսական գոտի» նախագծի համադրման ուղիների փնտրտուքի ուղղությամբ:
ԵՏՄ-ն միջազգային ինտեգրացիոն տնտեսական միավորում է, որի մասնակիցներն են Ռուսաստանը, Բելառուսը, Ղազախստանը, Հայաստանը եւ Ղրղզստանը: Միությունն իր աշխատանքը սկսել է 2015-ի հունվարի 1-ին` փոխարինելով Եվրասիական տնտեսական համագործակցությանը: