Եվրասիական գերագույն տնտեսական խորհրդի նիստին որոշում է կայացվել Սերբիայի հետ առեւտրի ռեժիմի միասնականացման վերաբերյալ բանակցություններ անցկացնելու մասին: Այդ մասին հայտնել է Եվրասիական տնտեսական հանձնաժողովի կոլեգիայի նախագահ Տիգրան Սարգսյանը, հայտնում է «Ինտերֆաքսը»:
«Այսօր որոշում է կայացվել Սերբիայի հետ բանակցություններ սկսելու մասին Եվրասիական տնտեսական միության եւ նրա անդամ պետությունների` այդ երկրի հետ առեւտրի ռեժիմի միասնականացման վերաբերյալ», - ասել է Սարգսյանը Եվրասիական գերագույն տնտեսական խորհրդի նիստի արդյունքներն ամփոփող հայտարարության մեջ, որ լրագրողների համար արել է երեքշաբթի Աստանայում:
ԵՏՀ-ի առեւտրի նախարար Վերոնիկա Նիկիշինան լրագրողներին հայտնել է, որ այսօր Միության միայն երեք երկիր ազատ առեւտրի համաձայնագիր ունի Սերբիայի հետ. Դրանք են Ռուսաստանը, Ղազախստանը եւ Բելառուսը, միաժամանակ այդ համաձայնագրերի որոշ դրույթներ տարբերվում են:
Հայաստանի եւ Ղրղզստանի հետ Սերբիան նման արտոնյալ ռեժիմ չունի, այդ պատճառով այդ երկրների հետ ապրանքների երկկողմ առեւտրում գործում է առավել բարենպաստության ռեժիմը, օրինակ` կիրառվում են մաքսային տուրքերի նույն դրույքաչափերը, որոնք սահմանված են ԱՀԿ-ի այլ գործընկերների համար:
«Բանակցությունների արդյունքում, որ մեզ հանձնարարված է սկսել, մենք պետք է ազատ առեւտրի մասին նոր համաձայնագիր կնքենք, արդեն` ԵՏՄ-ի, նրա անդամ պետությունների եւ Սերբիայի Հանրապետության միջեւ: Այսպիսով, Սերբիան ԵՏՄ-ի բոլոր երկրների հետ առեւտրի նույն ռեժիմը կունենա», - ասել է Նիկիշինան:
«Բացի այդ, սա օպտիմալ պահ է նոր պայմաններ քննարկելու. նայելու, թե Միության երկրներն ուրիշ ինչ ապրանքներ կարող են մատակարարել Սերբիային եւ այդ ապրանքների համար ավելի բարենպաստ ռեժիմ խնդրելու», - հավելել է նա:
ԵՏՀ-ում հույս ունեն, որ հաշվի առնելով, որ Միության երեք երկրի հետ արտոնյալ ռեժիմն արդեն հաստատված է, բանակցությունները կարող էին ընթանալ դինամիկ եղանակով: «Բայց առայժմ ոչ մի կերպ չենք կարող գնահատել, թե նոր համաձայնագիրը երբ կարող է կնքվել եւ ուժի մեջ մտնել», - նշել է նախարարը:
Փետրվարի կեսին Սերբիայի դեսպան Սլավենկո Տերզիչը հայտնել է, որ Բելգրադը հույս ունի Եվրասիական տնտեսական միության հետ ազատ առեւտրի գոտուն մասին համաձայնագիր ստորագրել 2016-ին:
Նա պարզաբանել է, որ Սերբիան տրամադրված է համաձայնագիր կնքելու ԵՏՄ-ի բոլոր անդամների հետ: