Եվրասիական տնտեսական հանձնաժողովը 2017-ին ԵՏՄ երկրների ղեկավարների հաաստատմանը կներկայացնի նավթի, նավթամթերքի ու գազի ընդհանուր շուկաների ստեղծման ծրագրերը: Այս մասին հայտնել է ԵՏՀ կոլեգիայի նախագահ Տիգրան Սարգսյանը՝ Գերագույն Եվրասիական տնտեսական խորհրդի նիստի արդյունքներով մամուլի համար հայտարարության ժամանակ, փոխանցում է «ՌԻԱ Նովոստին»:
ԵՏՄ պետությունների ղեկավարները մայիսի 31-ին հաստատել են ածխաջրածինների ընդհանուր շուկաների ձեւավորման հայեցակարգերը: Սարգսյանը պարզաբանել է, որ բոլոր երեք հայեցակարգերը՝ նավթի, նավթամթերքի ու գազի վերաբերյալ, կառուցված են նույն տրամաբանությամբ:
«Ըստ հայեցակարգի՝ միության երկրների էներգետիկ ընկերությունները կկարողանան իրենց գործընկերներից առանց քանակակական սամնափակումների եւ առանց մաքսատուրքերի նավթ ու նավթամթերք գնել այն շուկայական գնով, որը ձեւավորվելու է այդ թվում բորսային սակարկությունների ժամանակ»,- նավթային շուկայի օրինակով հայեցակարգերի հիմնարար սկզբունքներն է ներկայացրել Սարգսյանը:
Նրա խոսքով հայեցակարգերը առաջարկվում է իրականացնել երեք փուլով: «Մենք պետք է գալիք տարի մշակենք ու նախագահների հաստատմանը ներկայացնենք այդ հայեցակարգի իրականացման ծրագիրը, հետագայում կպատրաստվի նաեւ համապատասխան պայմանագիրը, որի ընդունումից հետո մենք մինչեւ 2025 թ. միասնական էներգետիկ շուկա կստեղծվի»,- հայտնել է ԵՏՀ ներկայացուցիչը:
Նա հավելել է, որ այդ նույն տրամաբանությամբ էլ կառուցվելու է ԵՏՄ գազի ընդհանուր շուկայի ստեղծման հայեցակարգը: «Այդ ընդհանուր շուկան նույն սկզբունքներով կձեւավորվի մինչեւ 2025 թ.»,- ասել է Սարգսյանը:
