Երեւանի Ս. Սպանդարյանի անվան 24 հիմնական դպրոցի տեխնոլոգիայի ուսուցիչը, որը աշակերտներից մեկի հոր պնդման, հարվածել է աշակերտին, շարունակում է աշխատել դպրոցում: Երեւանի քաղաքապետարանի կրթության վարչության պետ Գայանե Սողոմոնյանը NEWS.am-ի հետ զրույցում ասաց, որ ոչ թե նա է ծեծել աշակերտին, այլ աշակերտի ծնողն է ծեծել նրան:
«Մենք դեպքից հետո գնացինք, տեսանք տնօրենի կոտրված սեղանը, աթոռները, ուսուցիչների տագնապն ու անհանգստությունը: Ես տեսա արտասվող, հուզված ուսուցիչներին, տագնապալից իրավիճակ էր, որ հեռու էր մեր ոլորտից: Ես տեսա ուսուցչին՝ դեմքին հարվածի հետքը»,- ասաց Գայանե Սողոմոնյանը:
Քննչական կոմիտեից NEWS.am-ին հայտնեցին, որ քրեական գործ է հարուցվել թե ուսուցչի կողմից աշակերտի նկատմամբ կիրառված բռնության, թե տնօրենի սենյակում աշակերտի ծնողի մասնակցությամբ տեղի ունեցած միջադեպի կապակցությամբ: Քրեական գործերը հարուցվել են ՔՕ 118-րդ հոդվածի հատկանիշներով (ծեծելը կամ այլ բռնի գործողություններ կատարելը, պատժվում է տուգանքով՝ նվազագույն աշխատավարձի առավելագույնը հարյուրապատիկի չափով, կամ կալանքով՝ առավելագույնը երկու ամիս ժամկետով):
Նշանակվել են փորձաքննություններ, հարցաքննվել են միջադեպին մասնակից անձինք, վկաներ:
Հիշեցնենք, որ ըստ մամուլի հրապարակումների՝ աշակերտի հոր ու տեխնոլոգիայի տղամարդ ուսուցչի միջեւ ծեծկռտուք է տեղի ունեցել: Աշակերտի մայրը պնդում է, որ տեխնոլոգիայի ուսուցիչ Ալեքսան Գյոզալյանը ոլորել է իր որդու ականջը, ստիպել է ինչ-որ բան անել, կոպիտ բառեր է ասել, նսեմացրել է երեխայի արժանապատվությունը, հիվանդ է անվանել նրան: Նրա խոսքով՝ միջադեպին միջամտել է ամուսինը, որից հետո տնօրեն Աշոտ Ավետիսյանը ոստիկանություն է զանգահարել:
