Ղարաբաղյան հակամարտության շուրջ ստեղծված իրավիճակը կարող է այնպես շրջվել, որ պատերազմը դառնա հարցի լուծման միակ տարբերակը։ NEWS.am-ի թղթակցի հետ զրույցում նման կարծիք հայտնեց Էներգետիկ անվտանգության ռուսական ազգային ֆոնդի տնօրեն Կոնստանտին Սիմոնովը։
Նա ընդգծեց, որ ղարաբաղյան պատերազմը չի բխում ոչ Եվրամիության, ոչ ԱՄՆ շահերից։ Փորձագետի կարծիքով, Ադրբեջանը երկար ժամանակ չի կարող հաշտվել ներկայիս ստատուս-քվոյի հետ, քանի որ գիտակցում է, որ այդ ընթացքում իր էներգոռեսուրսները կսպառվեն եւ ինքը չլուծված խնդիրները պետք է լուծի մինչեւ 2020 թվականը։
Սիմոնովի խոսքով, տարօրինակ չի լինի, եթե Ռուսաստանի հետ հարաբերություններում Ադրբեջանը Ղարաբաղն օգտագործի իբրեւ փոխանակման միջոց։ «Ասենք, Ադրբեջանը կարող է ասել, մեծացնում ենք գազամատակարարման ծավալները, իսկ դրա փոխարեն դու՝ Ռուսաստան, կոպիտ ասած, մեզ պետք է հանձնես Հայաստանն ու Ղարաբաղը»,- նշեց փորձագետը։
Հայ-թուրքական հարաբերությունների կարգավորմանը եւս, մոտակա ժամանակներս, Սիմոնովի խոսքով, չարժե սպասել նույն Ադրբեջանի պատճառով, քանի որ ադրբեջանական գազի տարանցումը Թուրքիայի տարածքով լուրջ արգումենտ է։