Մեծի Տանն Կիլիկիո կաթողիկոս Արամ Ա-ն վերջին օրերին Սիրիայում ու մասնավորապես Հալեպում տեղի ունեցող իրադարձությունների առնչությամբ հեռախոսազրույց է ունեցել Բերիո Թեմի Առաջնորդ Գերշ. Տ. Շահան Սրբազան արքեպիսկոպոս Սարգսյանի հետ: Այս մասին NEWS.am-ը տեղեկանում է Մեծի Տանն Կիլիկիո կաթողիկոսության մամլո դիվանից:
Հաղորդագրությունում, մասնավորապես ասվում է.
«Վստահաբար մեր ժողովրդի զավակները հետեւում են, հատկապես վերջին օրերին, ընդհանրապես Սուրիայի եւ մանավանդ Հալեպի հայաբնակ շրջաններում տեղի ունեցող ահավոր ռմբակոծումներին, որոնց հետեւանքով կան հայ զոհեր ու վիրավորներ։
Արամ Ա. Վեհափառ Հայրապետը շարունակում է մոտիկից հետաքրքրվել Սուրիայի անցուդարձերով, մասնավորաբար մեր համայնքի դիմագրաված դժվարություններով։ Մեծի Տանն Կիլիկիո Կաթողիկոսությունը շարունակում է Սիրիայի հայության համար իր հաստատած հիմնադրամի ճամփով առավելագույն չափով օգտակար լինել սիրիահայ զավակներին։
Անցնող մի քանի օրերին Նորին Սրբությունը հեռախոսային մշտական կապի մեջ է եղել Առաջնորդ Շահան Սրբազանին հետ։
Հայտնենք, որ որոշ չափով Հալեպի հայության թիվը նվազել է, սակայն կարեւոր թվով հայեր իրենց բնակությունը են հաստատել Լաթաքիայի, Թարթուսի, Քեսաբի եւ Սիրիայի ծովեզերյա շրջաններում։ Ազգային իշխանությունը աշխատանքի է լծվել հիշյալ շրջաններում եւ հետեւում է ազգային-եկեղեցական կյանքին:
Այս առիթով, Վեհափառ Հայրապետը մեր ժողովրդի զավակներին ցանկանում է հիշեցնել Սիրիայի հայության վերականգնման հրամայական անհրաժեշտությունը։ «Ճիշտ է, որ մեր ազգային կյանքում ունենք այլ առաջնահերթություններ, սակայն Սիրիայի հայության զորակցությունը կմնա առաջնահերթություն ու անհետաձգելի անհրաժեշտություն։ Հետեւաբար, պետք է շարունակել զորակցել Սիրիայի հայությանը»,- շեշտել է Վեհափառ Հայրապետը։