Ղրղզստանի մայրաքաղաք Բիշքեկում՝ կառավարական նստավայրում, հունիսի 7-ին մեկնարկել է ԱՊՀ Կառավարությունների ղեկավարների խորհրդի նիստը, որտեղ պլանավորվում է քննարկել ավելի քան 20 նախագիծ, հայտնում է «ՌԻԱ Նովոստի»-ն: Հայաստանը ներկայացնում է ՀՀ փոխվարչապետ Վաչե Գաբրիելյանը:
Կառավարությունների ղեկավարները հանդիպումներ կանցկացնեն նեղ եւ ընդլայնված կազմերով, որոնց ընթացքում կքննարկեն տարբեր ոլորտներում ԱՊՀ երկրների համագործակցության խորացմանն ու ընդլայնմանն ուղղված հարցեր:
Հարցերի մեծ մասը նվիրված է համագործակցության տնտեսական ոլորտին:
Ակնկալվում է, որ կքննարկվեն ազատ առեւտրի գոտու գործառնության արդյունավետության բարձրացմանը, նորարարական համագործակցության խորացմանը, էլեկտրաէներգետիկայի ոլորտում համագործակցությանը, ռադիոակտիվ աղբյուրների տեղափոխությանը, քիմիկական արդյունաբերությանը վերաբերող հարցեր: Նիստում պլանավորվում է քննարկել ԱՊՀ անդամ երկրներում մարդահամար անցկացնելու հարցը:
Բացի այդ, օրակարգում են նաեւ առողջապահության ոլորտում համագործակցության մի շարք հարցեր:
Կառավարությունների ղեկավարները կքննարկեն նաեւ ART EXPO միջազգային ցուցահանդեսի անցկացումը: Հանդիպումների ժամանակ կառավարությունների ներկայացուցիչները կքննարկեն ԱՊՀ մարմինների միասնական բյուջեում փոփոխությունների մասին նախագծերը եւ կնշագծեն հաջորդ հանդիպման տեղն ու օրը:
