«Էրեբունի» բժշկական կենտրոնում հոկտեմբերի 1-ին ամուսնու եւ սկեսուրի ծեծից մահացած Զարուհի Պետրոսյանի հուղարկավորությունը տեղի կունենա վաղը` հոկտեմբերի 5-ին, Աբովյան քաղաքում, իսկ այսօր երեկոյան տեղի կունենա նրա հոգեհանգստի արարողությունը: Այս մասին NEWS.am-ի թղթակցին ասաց Բյուրեղավանի «Խնամքի եւ պաշտպանության» կենտրոնի տնօրեն Գայանե Մարգարյանը: (Այս կենտրոնի սանն է եղել Զարուհի Պետրոսյանը):
Զարուհու դին տեղափոխվելու է նրա քրոջ՝ Հասմիկ Պետրոսյանի ամուսնու բնակարան: Ինչպես ասաց Գայանե Մարգարյանը՝ Զարուհու Պետրոսյանի սկեսուրը՝ Լիլիան, չի համաձայնել, որ իր հարսի թաղման հետ կապված արարողությունները տեղի ունենան այն տանը, ուր նա հարս է գնացել: Նա նույնիսկ հայտարարել է, թե «մենք ճիշտ ենք, լավ ենք արել, որ ծեծել ենք»:
Ի դեպ, առայժմ հայտնի չէ, թե որտեղ է Զարուհու մեկուկես տարեկան դուստրը: Ըստ նախնական տեղեկությունների՝ երեխան այժմ իր հոր ազգականներից մեկի տանն է:
Հիշեցնենք, որ սեպտեմբերի 30-ին, ժամը 20.00-ին, հիվանդանոցից ոստիկանության Մասիսի բաժնում հաղորդում է ստացվել, որ «գանգուղեղի հեմատոմա, աջ ձեռքի 2-րդ մատի միջին ֆալանգի փակ կոտրվածք` առանց տեղաշարժի, եւ մարմնի տարբեր շրջանների արյունազեղումներ» ախտորոշմամբ իրենց մոտ է ընդունվել 20-ամյա Զարուհի Պետրոսյանը: Նույն օրը, Զարուհի Պետրոսյանը տեղափոխվել էր «Էրեբունի» բժշկական կենտրոն, որտեղ հոկտեմբերի 1-ին, ժամը 3-ին մահացել էր:
Ինչպես NEWS.am-ին հայտնել էին Պետրոսյանի հարազատները, նրան օրեր շարունակ դաժան ծեծի էին ենթարկել ամուսինն ու սկեսուրը, ինչի հետեւանքով կնոջը տեղափոխել էին հիվանդանոց, որտեղ էլ նա մահացել էր: