Ռուսաստանի Հակաօդային պաշտպանության համակարգին Հայաստանի միանալու մասին համաձայնագիրը, իհարկե, սահմանափակում է մեր հնարավորությունները: Այս մասին հայտարարել է «Ժառանգություն» խմբակցության պատգամավոր Զարուհի Փոստանջյանը հունիսի 14-ի մամուլի ասուլիսի ժամանակ:
Ընդհանուր առմամբ նրա խոսքով ռազմավարական նշանակության ցանկացած իրավունք մեկ այլ պետության տրամադրելը պարզապես դավաճանություն է: «Եթե նայենք Ռուսաստանի կողմից մեզ թելադրված վերջին փաստաթղթերին, այնպիսի տպավորություն կստեղծվի, որ Ռուսաստանը մշտապես ուզում է հայտարարել, որ ինքն է այստեղ տեր ու տիրակալ ու երբեք չի հեռանա այս տարածքից: Ես համարում եմ, որ այս համաձայնագրով Ռուսաստանին նորից նման հնարավորություն է ընձեռվում, ու մենք զիջում ենք մեր իրավունքները: Մենք չպետք է մեր երկրի պաշտպանությունը թողնենք մեկ այլ պետության ձեռքերում»,- շեշտել է Զարուհի Փոստանջյանը:
Հիշեցնենք, որ Ռուսաստանի հակաօդային պաշտպանության համակարգին Հայաստանի միանալու մասին համաձայնագիրը հունիսի 3-ին ստացել է ԱԺ-ի դրական եզրակացությունը: «Կովկասյան տարածաշրջանում անվտանգության միավորված համակարգի շրջանակում Հայաստանի ու ՌԴ –ի միավորված ՀՕՊ համակարգ ստեղծելու մասին» համաձայնագիրը ստորագրվել էր 2015-ի դեկտեմբերի 23-ին: Համաձայնագիրը հնարավորություն է տալիս օգտագործել ՌԴ օդատիեզերական ուժերը՝ ընդհուպ մինչեւ միջուկային զենքի կիրառում: ՕՏՈւ-երը ունեն արբանյակային համակարգ, որը կարող է օգտագործվել Հայաստանի տարածքում՝ ՀՀ ԶՈւ ՀՕՊ շահերից: Ռուսական կողմն ունի հսկողության համակարգեր, որոնք նույնպես կարող են գործածվել ՀՀ ԶՈՒ ՀՕՊ շահերից:
Ըստ համաձայնագրի՝ հայկական կողմը իր ՀՕՊ համակարգը ամբողջությամբ չի տրամադրում տարածաշրջանային միավորված համակարգին: Հետեւաբար հայկական կողմն ինքն է որոշում, թե իր ՀՕՊ համակարգի ո՛ր մասը կտրամադրի տարածաշրջանային միավորված ՀՕՊ համակարգին կամ կհանի դրա կազմից: Տվյալ հարցում Հայաստանի ԶՈւ ՀՕՊ զորքերը պահպանում են իրենց ինքնուրույնությունը:
