Գյումրիում մայիսի 14-ին «Դղյակ» սուպերմարկետի սեփականատեր Գուրգեն Ավետիսյանի սպանության համար ձերբակալված, ապա ազատ արձակված Արմեն Փափազյանի նկատմամբ քրեական հետապնդումը դադարեցվել է: Այս մասին NEWS.am-ի թղթակցին ասաց Փափազյանի փաստաբան Արամայիս Հայրապետյանը:
«Ազատ արձակվելուց հետո Արմեն Փափազյանի մեղադրանքը վերաորակվել էր որպես խուլիգանություն: Այժմ արդեն նրա նկատմամբ քրեական հետապնդումը դադարեցվել է եւ վկայի կարգավիճակ ունի»,- ասաց փաստաբանը:
Նշենք, որ Արմեն Փափազյանը դեպքից ժամեր անց բերման էր ենթարկվել ոստիկանության բաժին եւ խոստովանական ցուցմունք տվել: Նախաքննական մարմնին հաջողվել էր պարզել, որ սպանությունն իրականում կատարել է այլ անձ: Թե ինչու էր Փափազյանը նման ցուցմունք տվել, փաստաբանը փակագծերը չի բացում՝ նշելով, որ այս գործով քննությունը շարունակվում է:
Ավելի վաղ ոստիկանության լրատվական ծառայությունը հայտնել էր, որ 2016թ. մայիսի 14-ին Գյումրիի բնակիչ 40-ամյա գործարար Գուրգեն Ավետիսյանը հիվանդանոցի ճանապարհին մահացել է:
Պարզվում է, որ նույն օրը գերեզմանոցում հավաքվածների միջեւ տեղի է ունեցել վիճաբանություն, որը վերածվել է ծեծկռտուքի: Նրանց մի մասը ծեծկռտուքը շարունակել են Ղարսի խճուղում գտնվող Արամ Մովսիսյանին պատկանող ֆերմայում:
Ֆերմայի տարածքում հայտնաբերվել են պարկուճներ եւ գնդակ: Ոստիկանները մեկ օր անց՝ մայիսի 15-ին, Թալինի խաչմերուկից ոստիկանության Մուշի բաժին բերման է ենթարկվել գյումրեցի Արմեն Փափազյանը, որը խոստովանել է, որ ինքն է հրազենով սպանել Գուրգեն Ավետիսյանին:
Ըստ նախնական տվյալների, Արմեն Փ.-ի եւ սպանվածի եղբոր միջեւ գերեզմանոցում ընդհարում է եղել: Ոստիկանությունը պարզել է, սակայն, որ Արմեն Փ.-ն չի եղել կրակողը: Քանի որ վիճաբանությունն իր պատճառով է եղել, նա իր վրա է վերցրել մեղքը:
Ոստիկանները սկսել են սպանության կասկածանքով որոնել ֆերմայի տիրոջը՝ 45-ամյա Արա Մովսիսյանին: Նա մայիսի 18-ին մեղայականով ներկայացել է ոստիկանություն:
Նախաքննությունը շարունակվում է: