Զարուհի Փոստանջյանը 15 տարի շարունակ հայտարարում է իշխանությունը վերցնելու մասին,դա նորություն չէ։ Այս մասին NEWS.am-ի հետ զրույցում ասաց ԱԺ ՀՀԿ խմբակցության ղեկավար Վահրամ Բաղդասարյանն՝ արձագանքելով Փոստանջյանի այն հայտարարությանը, որ իրենք քաղաքական հայտ են ներկայացնում Գյումրիում եւ Վանաձորում իշխանազրկելու Հանրապետական կուսակցությանը։
«Բայց կա՞ այդ կուսակցությունը, Ազգային ժողովում խմբակցությունը չկա․․․ երեւի կա, հա կուսակցությո՞ւնը․․․ Զարուհի Փոստանջյանն արդեն 15 տարի հայտարարում է այդ մասին, ես անկամքի մեկը կասեի իրեն, եթե նման ցանկություն չունենա, եթե որեւէ քաղաքական ուժ մտնում է ընտրապայքարի մեջ եւ այդ նպատակը չի դնում, ուրեմն իր մասնակցությունը ինքնանպատակ է»,-ասաց Վահրամ Բաղդասարյանը։
Նշենք, որ Զարուհի Փոստանջյանը մեզ հետ զրույցում հայտարարել էր, որ իրենք մասնակցելու են Գյումրիի եւ Վանաձորի քաղաքապետի ընտրություններին եւ խնդիր են դրել իշխանազրկել «Հանրապետական կուսակցությանը»։
