Տեմպլի համալսարանի հետազոտողները ճարպերի ցածր պարունակությամբ շոկոլադի արտադրության նոր մեթոդ են մշակել: Դրա համար նրանք օգտագործում են էլեկտրական դաշտը, որը ստեղծում են հեղուկ շոկոլադի հոսքի ուղղությամբ, հայտնում է Lenta-ն:
Քիչ ճարպեր պարունակող շոկոլադի հիմնական խնդիրներից մեկն այն է, որ ճարպայնության նվազումը հանգեցնում է մածուցիկության եւ գործարանային հոսքագծի խողովակաշարերի խցանման: Գիտնականները որոշել են այդ խոչընդոտը հաղթահարել էլեկտրական դաշտի օգնությամբ, որը կակաոյի կարծր մասնիկներին ստիպում է խմբավորվել կարճ շղթաների, սֆերոիդների եւ այլ հոսուն ձեւերի մեջ: Այդ մոտեցումը թույլ է տալիս նվազեցնել ճարպերի նվազագույն քանակությունը, որն անհրաժեշտ է հոսքի նորմալ արագության ապահովման համար:
Հալված շոկոլադն իրենից ներկայացնում է կակաոյի, շաքարի, կաթի խառնուրդ, որը գտնվում է կակաոյի հոսուն յուղի մեջ: Այն բնութագրվում է երկու հիմնական պարամետրով. առավելագույն խտությամբ, որի դեպքում կորում է հոսունությունը (maximally random jammed density) եւ մասնիկներին բնորոշ մածուցիկությամբ: Երկրորդ պարամետրը ցույց է տալիս, թե լուծույթի կազմում առկա նյութն ինչ ներդրում ունի ընդհանուր մածուցիկության մեջ:
Փորձարկումները ցույց են տվել, որ մեկ սմ-ի վրա 1600 Վոլտ էլեկտրական դաշտը Mars շոկոլադի մածուցիկությունը նվազեցնում է 43,5 տոկոսով, միաժամանակ զգալիորեն ավելանում է առավելագույն խտությունը: Այդ ամենը թույլ է տալիս 10 տոկոսով նվազեցնել ճարպերի առկայությունը: Նմանատիպ արդյունքներ են ստացվել նաեւ այլ արտադրողների նմուշների համար, ինչը ցույց է տալիս մեթոդի լայն կիրառելիությունը: Գիտնականները հույս ունեն, որ իրենց մեթոդը թույլ կտա ոչ ճարպոտ շոկոլադ արտադրել, որն ավելի համեղ կլինի եւ միաժամանակ ավելի փոքր բացասական ազդեցություն կունենա մարդու սրտանոթային համակարգի վրա: