Վրաստանի արտգործնախարար Գրիգոլ Վաշաձեն անգրագիտություն եւ դիվանագետին ոչ հարիր գործելաոճ է ցուցաբերել՝ Հայաստանում հայտարարելով, թե Ջավախք անունով տարածաշրջան չի ճանաչում: Այդ մասին հայտարարել է ՀՅԴ խմբակցության ղեկավար Վահան Հովհաննիսյանը՝ մեկնաբանելով Վրաստանի ԱԳՆ ղեկավարի արած հայտարարությունը: «Հավանաբար նա նկատի ուներ, որ բոլորը պետք է այդ տարածաշրջանն անվանեն «Ջավախեթի»՝ վրացական տարբերակով: Դա անգրագիտություն է եւ հարիր չէ դիվանագիտին: Ոչ ոք մեզ չի կարող պարտադրել, որ մենք Վրաստանը Սաքարթվելո անվանենք»,- նկատել է Հովհաննիսյանը:
Նա նաեւ ցավ է հայտնել, որ ինքն է ստիպված այդ մասին բարձրաձայնում Ազգային Ժողովի ամբիոնից, փոխանակ Հայաստանի դեսպանատունը, կամ նույն ասուլիսին ներկա Հայաստանի արտգործնախարար Էդուարդ Նալբանդյանը պարզաբանումներ տային ասուլիսի ժամանակ:
«Հայաստանն ասել է, թե տարածքային խնդիրներ չունի Վրաստանի հետ: Որտեղի՞ց է գալիս մեր հարեւանների այդ հիվանդագին վերաբերմունքը, երբ հայ պատգամավորին արգելում են այցելել Ջավախք, երբ հակահայկական քայլեր են կատարվում, հայաթափում են Ջավախքը»,- ընդգծել է դաշնակցական պատգամավորը:
