Թուրքիայում եւ Ադրբեջանում ավելացել է հակահայկան հիստերիան: Այդ մասին հոկտեմբերի 5-ին խորհրդարանական հայտարարությունների ժամին ասել է Հանրապետական կուսակցության պատգամավոր, խմբակցության քարտուղար Էդուարդ Շարմազանովը: Վերջինս նշել է, որ «Աղթամարի տխրահռչակ շոուից հետո թուրքերը նամազ արեցին Անիի Մայր Տաճարում», ինչը հերթական անգամ ապացուցեց Թուրքիայի հակահայ էությունը:
Շարմազանովն անդրադարձել է նաեւ Թուրքիայի արտգործնախարար Ահմեդ Դավութօղլուի վերջերս արած հայտարարությանը, թե «հայ-թուրքական հարաբերությունները կկագավորվեն միայն ղարաբաղյան հակամարտության լուծման եւ Ադրբեջանի տարածքային ամբողջականության ապահովումից հետո»: «Տարածքային ամբողջականության մասին խոսում է մի երկրի արտգործնախարար, որն օրը ցերեկով զավթել է Կիպրոսի մի մասը»,- նշել է Շարմազանովն ու հավելել, որ Թուրքիան առաջնորդվում է ոչ թե «զրո խնդիր հարեւանների հետ» սկզբունքով, այլ զրոյի է հասցնում Եվրամիությանն անդամակցելու իր շանսերը:
