ՀՀ նախագահ Սերժ Սարգսյանն այսօր՝ հունիսի 22-ին, շնորհավորական ուղերձ է հղել Հայաստանի Հանրապետության ժողովրդական նկարիչ, քանդակագործ Արտաշես Հովսեփյանին՝ 85-ամյակի առթիվ:
«Դուք հայ կերպարվեստի եւ քանդակագործության մեծագույն վարպետներից եք: Ձեր ստեղծագործությունները, թողած հսկայական ժառանգությունը շարունակելու են գնահատել եւ իմաստավորել արվեստաբանների եւ արվեստասերների ապագա սերունդները:
Արտերկրում ստանալով փայլուն մասնագիտական կրթություն՝ Դուք Հայաստան բերեցիք ակադեմիական կերպարվեստի շունչն ու ոգին՝ ստեղծելով բազմաթիվ մնայուն արժեքներ:
Մաղթում եմ Ձեզ առողջություն, անսպառ ուժ ու եռանդ, ստեղծագործական նոր հաջողություններ»,-ասված է Հանրապետության նախագահի շնորհավորական ուղերձում:
Նշենք, որ Արտաշես Հովսեփյանը Թամանյանի արձանի հեղինակն է: