Վրաստանի նախագահ Գեորգի Մարգվելաշվիլին կարգադրություն է ստորագրել 5 պետություններում՝ Հայաստանում, Եգիպտոսում, Շվեդիայում, Ֆինլանդիայում եւ Հնդկաստանում, Վրաստանի դեսպաններ նշանակելու մասին: Այս մասին հայտնում է «Սպուտնիկ Գրուզիա»-ն՝ վկայակոչելով նախագահի պաշտոնական կայքը:
Հայաստանում Վրաստանի դեսպան է նշանակվել Գեորգի Սագանելիձեն: Նա աշխատանքային կարիերան սկսել է 1988-ին Վրաստանի ԱԳՆ-ում: 2005-2008թթ. եւ 2013-2015թթ. աշխատել է Հայաստանում Վրաստանի դեսպանատանը:
Եգիպտոսում Վրաստանի դեսպան է դարձել Սլովենիայում եւ Սլովակիայում Վրաստանի նախկին դեսպան Ալեքսանդր Նալբանդովը: Շվեդիայում եւ Ֆինլանդիայում Վրաստանի դիվանագիտական ներկայացուցիչ է նշանակվել Ռուսաստանում նախկին դեսպան Մալխազ Կակաբաձեն:
Հնդկաստանում Վրաստանի դիվանագիտական ներկայացուցչությունը կղեկավարի Եգիպտոսում Վրաստանի նախկին դեսպան Արչիլ Ձուլիաշվիլին:
