Հռոմի Պապի այցը Հայաստան՝ որպես առաջին քրիստոնյա պետություն, իհարկե, նոր խթան կտա Պապի արխիվներն օգտագործելու հնարավորության տեսակետից: Այս մասին հունիսի 22-ին կայացած մամուլի ասուլիսին ասել է Հայաստանի ազգային արխիվի տնօրեն Ամատունի Վիրաբյանը:
Նրա խոսքով՝ Հռոմի Պապի արխիվում տվյլաներ կան աշխարհի բոլոր ժողովուրդների մասին: «Խնդիրն այն է, որ արխիվում պահվող հսկայական տեղեկությունը կարգավորված չէ: Հայոց պատմության մասին փաստաթղթերում նույնպես կան մութ էջեր: Մենք 3-4-րդ դարերից կապ ենք պահպանում Հռոմի Պապի հետ: Բայց մեզ ավելի շատ հետաքրքրում են փաստաթղթերը, որոնք կապված են Հայոց ցեղասպանության հետ»,- նշել է Վիրաբյանը: Հռոմի Պապը գրեթե բոլոր երկրներում, այդ թվում՝ Օսմանյան կայսրությունում, ուներ իր ներկայացուցիչը: Վիրաբյանի խոսքով՝ 19-րդ դարից սկսած՝ Հռոմի Պապի արխիվներում զեկույցներ են կուտակվել Օսմանյան կայսրությունում քրիստոնյաների վիճակի մասին:
Ամատունի Վիրաբյանը հայտնեց, որ Ազգային արխիվն արդեն ունի Հռոմի Պապի բաց արխիվների փաստաթղթերի պատճեները: «Հարցն այն է, որ այդ արխիվները կամ լատիներեն են կամ ֆրանսերեն, եւ թարգմանության խնդիրներ կան: Եթե ֆրանսերենցի թարգմանությունն այդքան դժվարություններ չի առաջացնում, լատիներեից թարգմանելը խնդիր է»,- նշել է Վիրաբյանը: