Քննչական կոմիտեն նոր մանրամասներ է հաղորդում Գյումրիում մոր եւ որդու սպանության դեպքի վերաբերյալ:
Ըստ Կոմիտեի տարածած հաղորդագրության՝ հունիսի 16-ին մայր եւ որդի Սիրիկ եւ Սարգիս Հակոբյանները հյուրընկալել են վաղեմի ծանոթին՝ Գ.Խաչանյանին, որը գիշերել է նրանց տնակում։ Հաջորդ օրն առօրյա գործերն ավարտելուց հետո միասին հաց են կերել եւ ալկոհոլ օգտագործել, որին մասնակցել են Հակոբյանները, Գ.Խաչանյանը եւ վերջինիս ընկերուհին։ Անձնական հարցերի շուրջ Ս.Հակոբյանի եւ Գ.Խաչանյանի միջեւ առաջացել է վիճաբանություն, ինչը վերածվել է ծեծկռտուքի, որի ժամանակ էլ Գ.Խաչանյանի կողմից Հակոբյաններին պատճառվել են կյանքի հետ անհամատեղելի մարմնական վնասվածքները։
Սպանության կասկածանքով Գ.Խաչանյանը ձերբակալվել է եւ հարցաքննվել։ Քննություն է տարվում՝ կասկածյալի մատնանշած հանգամանքներն ստուգելու ուղղությամբ։ Նշանակվել են փորձաքննություններ։
Հիշեցնենք, որ հունիսի 20-ին՝ ժամը 15:20-ին, ահազանգ է ստացվել, որ Գյումրու «Ֆանտաններ» թաղամասում բնակվող Սարգիս Հակոբյանը եւ նրա մայրը մի քանի օր է, ինչ չեն արձագանքում, վերջիններիս տնակից տհաճ հոտ է գալիս:
Դեպքի վայրի զննությամբ Գյումրի քաղաքի 228/268 տնակում հայտնաբերվել են նույն տնակի բնակիչներ 80-ամյա Սիրիկ Հակոբյանի եւ 56-ամյա Սարգիս Հակոբյանի դիակները: