Թուրքիայի իշխող «Արդարություն եւ զարգացում» կուսակցությունը մի քանի տարի առաջ ուզում էր Գեզի զբոսայգում վերակառուցել Օսմանյան կայսրության ժամանակ եղած զորանոցները՝ վերածելով դրանք առեւտրի կենտրոնի, որոնցով առանց այն էլ լի է Ստամբուլը: Էրդողանը չի հրաժարվել այդ գաղափարից: Թե այս անգամ ինչով կավարտի այդ փորձը, կլինեն արդյոք ցույցեր, դժվար է ասել: Սակայն այս անգամ Թուրքիան ավելի անկայուն ոտքերի վրա է կանգնած, գրում է Zeit-ի հոդվածագիրը:
Նախորդ անգամ կառավարությունը ցույցերից հետո հրաժարվել էր այդ գաղափարից, հիշեցնում է հեղինակը: «Անցյալ հանգստյան օրերին, սակայն, Էրդողանը նորից հայտնեց Գեզի զբոսայգում շինարարություն սկսելու նախագծի մասին: Առեւտրի կենտրոնի մասին այս անգամ չխոսվեց: Դրա փոխարեն նա խոսում էր զորանոցի կողքին մզկիթի եւ օպերային թատրոնի շինարարության մասին»,- գրում է հեղինակը՝ հավելելով, որ դժվար է գնահատել, թե ինչ կլինի այս անգամ:
«Մի կողմից հասարակության մի մասը գնալով ավելի դժգոհ է մնում կառավարության քաղաքականությունից, մյուս կողմից իրավիճակը փոխվել է. մարդիկ շատ են բեւեռացվել: Ի տարբերություն 2013-ի ցույցերի՝ հիմա բողոքում են ոչ միայն բնապահպանները, այլ նաեւ թուրքական հասարակության ամբողջ սպեկտրը, քանի որ Թուրքիան պառակտված է ավելի, քան երբեք»,- ասում է նախկինում Գեզիի ցույցերին մասնակցած Մուրադ Չեթինը, որը ճարտարապետների պալատի անդամ է:
«Դեռ հասկանալի չէ, թե այս անգամ նորից ցույցներ կսկսվեն, թե ոչ, սակայն Թուրքիայում հիմա իրավիճակը շատ ավելի լարված է, քան մի քանի տարի առաջ»,- գրում է հեղինակը:
