Գերմանական Lurssen նավաշինարանը պաշտոնապես հաստատել է, որ ռուսաստանցի գործարար Ալիշեր Ուսմանովին պատկանող 156 մետրանոց Dilbar գերզբոսանավի համախառն տարողունակությունը կազմում է 15917 տ, հայտնում է Yacht Harbour-ը:
Այսպիսով, Dilbar-ը ներկայումս աշխարհում ամենաընդարձակ մասնավոր զբոսանավն է: Երկրորդ եւ երրորդ տեղերում Օմանի սուլթանին պատկանող Al Said-ն է (15850 տ) եւ Աբու Դաբիի էմիրի Azzam-ը (13136 տ): Դրանք բոլորը կառուցվել են Lurssen նավաշինարանում:
Այս տարի ավելի վաղ պատվիրատուին հանձնված Dilbar-ը սարքավորված է դիզելաէլեկտրական ուժային սարքավորմամբ, որը նավին թույլ է տալիս շարժվել 22,5 հանգույց հածանավային արագությամբ (մոտ 42 կմ/ժ): Զբոսանավի հիմնակմախքը պողպատե է, վերնաշենքը ալյումինե է, տարածքների ընդհանուր մակերեսը 3800 քմ է: Նշվում է, որ նավի ներսում օգտագործված էլեկտրահաղորդալարերի երկարությունը միայն գերազանցում է 1100 կմ-ն: Զբոսանավի գինը չի բարձրաձայնվում, բայց փորձագետները այն մոտավորապես 600 մլն դոլար են գնահատում:
Ծովային տերմինաբանության մեջ համախառն տարողունակությունը նավի տարածքների ծավալն է, որը որոշվում է չափման հատուկ կանոններով եւ ծառայում է նավահանգիստներում գանձումների հաշվարկի համար: Միաժամանակ հաշվի է առնվում վերին տախտակամածի տակ գտնվող բոլոր տարածքների, վերնաշենքի եւ նավախցիկների ծավալը, բացառությամբ վառելիքային եւ բալաստային ցիստեռնների:
Ալիշեր Ուսմանովը ռուսաստանցի գործարար է, որը Forbes ամսագրի վարկածով մտնում է երեք ամենահարուստ ռուսաստանցիների թվի մեջ: Dilbar-ից բացի, նա նաեւ 110 մետրանոց Ona գերզբոսանավ ունի:
Lurssen Werft-ը գերմանական նավաշինական ընկերություն է, որը գտնվում է Բրեմենում: Հիմնադրվել է 1875-ին, մասնագիտանում է գերզբոսնավերի, ռազմանավերի եւ հատուկ նշանակության նավերի կառուցման մեջ: