Հինգշաբթի` հունիսի 23-ի առավոտյան ձախ արմատական երիտասարդությունը Բեռլինում անկարգություններ է կազմակերպել, հայտնում է The Local-ը:
Պարբերականի տվյալներով, անկարգությունների առիթ է դարձել ոստիկանական ստուգայցը մեկ օր առաջ անօրինականորեն զբաղեցված շենքերից մեկը: Օրենքի մոտ 200 պահապան ներխուժել է Ռիգեր փողոցի թիվ 94 տուն, որը երիտասարդներն առանց թույլտվության օգտագործում են հավաքների համար:
Օրենքի պահապանները խուզարկել են շենքը եւ մահակներ եւ ատրճանակ են առգրավել: Շինարարներն այդ ընթացքում վերացրել են շենքում անօրինականորեն բացված բարը եւ արհեստանոցը:
Ի պատասխան ձախ արմատականները անկարգություններ են կազմակերպել բեռլինյան մի շարք շրջաններում: Կրոյցբերգում անհայտ անձինք ջարդել են երեք մեքենայի եւ ավտոբուսի կանգառի ապակիները, հետո այրել են աղբամանը եւ քարեր եւ ներկային ռումբեր են նետել տեղի ադմինիստրացիայի շենքի ուղղությամբ: Պանկովի շրջանում շինարարական տեխնիկա է այրվել, իսկ Միտտեում ջարդվել են բանկերի շենքերի ապակիները: Արմատականները նաեւ մի քանի մեքենա են այրել:
Պարբերականը նշում է, որ Ռիգեր փողոցի թիվ 94 տունը այն փոքրաթիվ շենքերից մեկն է, որոնք գրավված են սկվոթերների կողմից` մարդկանց, որոնք լքված շինությունների գրավմամբ են զբաղվում: Ավելի վաղ ոստիկանության հետ երիտասարդ արմատականների բախումներ բավականին հաճախ էին պատահում, սակայն վերջին տարիներին գրեթե վերացել էին:
