ԵԽԽՎ-ում ադրբեջանական պատվիրակության անդամ Ռաֆայել Հուսեյնովն այդ կառույցի աշնանային նստաշրջանի շրջանակներում ԼՂ խնդրի վերաբերյալ փաստաթուղթ է պատրաստել:
Ինչպես հաղորդում է ադրբեջանական APA գործակալությունը, հռչակագրի տեսք ունեցող փաստաթուղթը կրում է «Լեռնային Ղարաբաղի հակամարտության խաղաղ կարգավորման արագացման անհրաժեշտությունը» անվանումը: Այն անգլերենով եւ ֆրանսերենով տարածվել է Եվրախորհրդում: Փաստաթուղթը ստորագրել են ԵԽ անդամ 15 երկրների 20 պատվիրակներ:
Փաստաթղթում նշվում է, որ թեեւ Ադրբեջանի տարածքի շուրջ 20 տոկոսն «օկուպացված է», «շուրջ մեկ միլիոն քաղաքացիներ» փախստական եւ բռնի տեղահանված են դարձել, Բաքուն առաջարկում է հետեւողական ջանքեր գործադրել ԼՂ խնդիրը կարգավորելու ուղղությամբ: Փաստաթղթում մասնավորապես, նշվում է.
«ԱՄՆ-ի, Ռուսաստանի եւ Ֆրանսիայի նախագահները 2009-ին Իտալիայում եւ 2010-ին Կանադայում, հանդես գալով համատեղ հայտարարությամբ, նշել էին ԼՂ խնդրի խաղաղ կարգավորման բազմակողմանի նախագծի պատրաստման անհրաժեշտության մասին: Այդ ֆոնին այն, որ Հայաստանը դեռեւս պատասխան չի տվել Մադրիդյան նորացված սկզբունքներին, որոնք ենթադրում են ԵԱՀԿ Մինսկի խմբի կողմից ԼՂխնդրի շուտափույթ կարգավորում եւ շփման գծի ողջ երկայնքով պարբերաբար խախտում է հրադադարը 2010-ի ամռանից սկսած, անհանգստության տեղիք է տալիս: Հայաստանը խաղաղ պայմանագրի փոխարեն, ուշադրությունը շեղում է հրադադարի ռեժիմը կատարելագործելու վրա, ինչը ժամանակավոր միջոց է` խնդիրն արմատապես լուծելու ճանապարհին: «Ոչ խաղաղություն, ոչ պատերազմ» տարբերակն ու անարդյունք բանակցությունները չեն կարող անվերջ ձգվել: Օդում կախված պատերազմի վտանգը լուրջ սպառնալիք է ստեղծում հետագա խաղաղությանն ու կայունությանը Հարավային Կովկասում, Եվրոպայում եւ այլուր:
Եվս մեկ անգամ հայտարարելով Վեհաժողովի անդամ երկրների միջեւ այս իրավիճակի անցանկալիության մասին, նշում ենք ԼՂ հակամարտությունը դիվանագիտական եւ խաղաղ ճանապարհով լուծելու ուղղությամբ կոնկրետ ջանքերի ավելացման անհրաժեշտությունը»: