ԵՄ–ից Մեծ Բրիտանիայի դուրս գալու հարցով հանրաքվեին մասնակցությունը բարձր է։ Միջազգային խորհրդատվական Dods Training ընկերության դիտորդներն արձանագրել են, որ առավոտյան ժամը 11։30-ի դրությամբ հանրաքվեին մասնակցել էր քվեարկության իրավունք ունեցողների ավելի քան 25 տոկոսը, փոխանցում է «ՌԻԱ Նովոստի»–ն։
Սրանք ոչ պաշտոնական թվեր են։ Մի շարք ընկերություններ հանրաքվեի օրը սեփական հարցումներն ու հետազոտություններն են անցկացրել։
«Ընտրատեղամասերում, որոնք մենք այցելել ենք երկրի հյուսիս–արեւմուտքում, ժամը 11։30-ին մասնակցությունը կազմել է 25 տոկոս։ Ակնկալվում է, որ հանրաքվեի ավարտին քվեարկողների մասնակցությունը բարձր կլինի»,– գրված է ընկերության Twitter–ի էջում։
Dods Training–ը նշում է, որ ընտրողները ակտիվ գնում են քվեարկելու, երբեմն հերթեր են գոյանում։
Փորձագետների կարծիքով քվեարկության արդյունքն անմիջականորեն կախված է ընտրողների ներկայությունից։ Եթե այն հատի 60 տոկոսի շեմը, դա կնշանակի Brexit–ի ընդդիմադիր ճամբարի հաղթանակ։