Հոկտեմբերի 5-ին՝ ԵԽԽՎ աշնանային նստաշրջանի երկրորդ աշխատանքային օրը կայացել է Հայաստանի եւ Ադրբեջանի պատվիրակությունների հանդիպումը՝ ԵԽԽՎ նախագահ Մեւլյութ Չավուշօղլուի մասնակցությամբ: Հանդիպմանը մասնակցել են ԵԽԽՎ-ում հայկական պատվիրակության ղեկավար Դավիթ Հարությունյանն ու պատվիրակության անդամ Արմեն Ռուստամյանը, Ադրբեջանի պատվիրակության ղեկավար Սամեդ Սեիդովն ու Սաբիր Հաջիեւը:
Ինչպես հաղորդում է ադրբեջանական Trend գործակալությունը, հանդիպումից հետո Սամեդ Սեիդովը հայտարարել է, թե բանակցություններում որոշում է կայացվել շարունակել նման հանդիպումները: Երկու երկրների պատգամավորները որոշում են կայացրել, որ պատվիրակությունների հաջորդ հանդիպումը կայանալու է հոկտեմբերի 7-ին:
Ավելի վաղ, մամուլի ասուլիսում Չավուշօղլուն հայտարարել էր, թե մտադիր է հայկական եւ ադրբեջանական պատվիրակությունների հետ քննարկել Լեռնային Ղարաբաղի հարցով ենթահանձնաժողովի ստեղծման հարցը:
Նշենք, որ ԵԽԽՎ ազգությամբ թուրք նախագահը Ադրբեջանի ճնշման տակ համառորեն չի թողնում Լեռնային Ղարաբաղի հարցով ենթահանձնաժողով ստեղծելու ջանքերը: Ընդ որում, այն պայմաններում, երբ հայկական կողմը բազմիցս հայտարարել է, թե դեմ է նման նախաձեռնությանը:
