ԳԴՀ-ի կանցլեր Անգելա Մերկելը հայտնել է, որ Մեծ Բրիտանիայում հանրաքվեի արդյունքը մեծ ափսոսանք է առաջացնում եւ հունիսի 28-ին Բունդեսթագի անդամները կտեղեկացվեն այդ որոշման վերաբերյալ ԳԴՀ-ի կառավարության դիրքորոշման մասին, հայտնում է ՏԱՍՍ-ը:
«Մենք պետք է մեծ ափսոսանքով ի գիտություն ընդունենք բրիտանական քաղաքացիների մեծամասնության որոշումը, որոնք ցանկանում են վերջ տալ ԵՄ-ին Մեծ Բրիտանիայի անդամակցությանը», - ասել է նա: «Ես Բունդեսթագի անդամներին, որոնք երեքշաբթի արտակարգ նիստի կհավաքվեն, կտեղեկացնեմ այդ հարցի վերաբերյալ ԳԴՀ-ի կառավարության դիրքորոշմանը», - հայտնել է Մերկելը:
Կանցլերի խոսքով, հանրաքվեի ելքը նշանակում է «արմատական շրջադարձ Եվրոպայի, եվրոպական միավորման գործընթացի համար»: «ԵՄ-ի անդամներից մեկի` ընկերակցությունից դուրս գալու համար եվրոպական համաձայնագիրը հստակ ընթացակարգ է նախատեսում, դա նշանակում է բազմամյա բանակցություններ, որոնց արդյունքում համաձայնություն ձեռք կբերվի Մեծ Բրիտանիայի անդամությունը դադարեցնելու վերաբերյալ», - նշել է Մերկելը:
Նա ճշտել է, որ բանակցությունների ընթացքում Մեծ Բրիտանիան կմնա ԵՄ-ում. «Բոլոր իրավունքները եւ պարտավորություններն անհրաժեշտ է պահպանել մինչեւ ընկերակցությունից երկրի լիակատար դուրս գալը: Դա հավասարապես վերաբերում է երկու կողմին: Մեր նպատակը պետք է լինի ԵՄ-ի հետ Մեծ Բրիտանիայի սերտ եւ գործընկերության վրա հիմնված ապագա հարաբերությունների կառուցումը»:
Կանցլերը հայտնել է, որ Եվրախորհրդի նախագահ Դոնալդ Տուսկին, Ֆրանսիայի նախագահ Ֆրանսուա Օլանդին եւ Իտալիայի վարչապետ Մատտեո Ռենցիին Բեռլին է հրավիրել` քննարկելու հանրաքվեի արդյունքների վերաբերյալ իրավիճակը: Հանդիպումը տեղի կունենա հունիսի 27-ին:
«Գերմանիան հատուկ հետաքրքրություն է ապրում եւ հատուկ պատասխանատվություն է զգում եվրոպական միության կայացման համար: Այդ պատճառով ես Դոնալդ Տուսկին, Ֆրանսուա Օլանդին եւ Մատտեո Ռենցիին Բեռլին եմ հրավիրել` բանակցությունների: Եվրոպական Միությունը բավականաչափ ուժեղ է, որպեսզի ճիշտ պատասխաններ գտնի այսօր ստեղծված իրավիճակի համար», - ասել է Մերկելը: