Ֆրանսիայի արտգործնախարար Ժան Մարկ Էյրոն հայտարարել է, որ Մեծ Բրիտանիան պետք է արագ սկսի Եվրամիությունից դուրս գալու մասին Լիսաբոնի պայմանագրի 50-րդ հոդվածի ուղղությամբ աշխատանքները, հայտնում է Reuters–ը։
ԵՄ 6 անդամ երկրների արտգործնախարարների հանդիպման ավարտին նա նշել է, որ անթույլատրելի է համարում Մեծ Բրիտանիայի կողմից «մուկն ու կատու» խաղալը։
«Իհարկե, նոր վարչապետ պետք է նշանակվի, ինչը մի քանի օրվա ձգձգման է պատճառ կդառնա։ Բայց դա շատ հրատապ հարց է։ Բրիտանիայի եւ եվրոպացիների շահերից է բխում չերկարաձգել անորոշության ժամկետը, որը կարող է հանգեցնել տնտեսական եւ քաղաքական հետեւանքների»,– ասել է Էյրոն։
Հիշեցնենք, որ նախօրեին կայացած հանրաքվեի արդյունքում ԵՄ–ից Մեծ Բրիտանիայի դուրս գալու կողմնակիցները հաղթահարել են 16.7 մլն ձայնի շեմը:
Մեծ Բրիտանիայի դուրս կգա Եվրամիությունից՝ այդ միությունում 43 տարվա անդամակցությունից հետո: Բրիտանացիների 51.9 տոկոսը կողմ է քվեարկել ԵՄ-ից Մեծ Բրիտանիայի դուրս գալուն, իսկ դեմ՝ 48.1 տոկոսը: Հյուսիսային Իռլանդիայի եւ Շոտլանդիայի քաղաքացիները կողմ են արտահայտվել ԵՄ կազմում մնալուն։