Երեւանի Ագաթանգեղոսի 7-րդ շենքի 7-րդ հարկից ընկած 16-ամյա աղջկա հարեւաններն ասում են, որ աղջիկը սելֆի անելիս չի ընկել պատշգամբից, այլ վարագույր կախելիս:

NEWS.am-ի հետ զրույցում հարեւանները նշեցին, որ 16-ամյա Ժ. Ե-ն վարագույր կախելիս է եղել, երբ հավասարակշռությունը կորցրել է եւ ընկել պատուհանից: Նրանց խոսքով, աղջկան առաջինն օգնություն են ցույց տվել անցորդներն ու շենքի առաջին հարկում գտնվող խանութների աշխատակիցները, զանգահարել են «Շտապօգնություն», որից հետո աղջկան անգիտակից, ծանր վիճակում տեղափոխել են հիվանդանոց:

Հիշեցնենք, որ ոստիկանությունից NEWS.am-ին տեղեկացրել էին, որ ըստ նախնական տվյալների՝ աղջիկը պատշգամբին նստած նկարվելիս է եղել, երբ կորցրել է հավասարակշռությունը եւ ընկել 7-րդ հարկից:

Երեւանի «Սուրբ Գրիգոր Լուսավորիչ» հիվանդանոցից էլ NEWS.am-ին տեղեկացրել էին, որ 16-ամյա աղջիկը գտնվում է հիվանդանոցի Վերակենդանացման բաժանմունքում, նրա վիճակը ծանր է, այս պահին վիրահատության միջամտության կարիք չկա:

Ավելի վաղ տեղեկացրել էինք, որ Երեւանի շենքերից մեկից 16-ամյա աղջիկ է ընկել: