Հայաստանի շահերից է բխում օր առաջ հրաժարվել քաղբանտարկյալներ ունեցող երկրի պիտակից։ Այս մասին այսօր՝ հունիսի 27-ին, Ազգային ժողովում ասաց ԱԺ ՀԱԿ խմբակցության պատգամավոր Նիկոլ Փաշինյանը՝ անդրադառնալով Ժիրայր Սեֆիլյանի կալանքին։
«Ժիրայր Սեֆիլյանը կալանավորված է, ակնհայտ է՝ մենք գործ ունենք քաղաքական հետապնդման հետ։ 1 տարի 3 ամիս առաջ Սեֆիլյանի դեմ հարուցված քրեական գործի նախաքննությունը շարունակվում է, եւ այժմ էլ նոր քրեական գործով են կալանավորում։ Ես դատապարտում եմ Հայաստանում շարունակվող քաղաքական հետապնդումները, որոնք իրականացվում են քրեական հոդվածների տանիքի տակ, եւ կարծում եմ՝ Հայաստանի շահերից է բխում օր առաջ հրաժարվել քաղբանտարկյալ ունեցող երկրի պիտակից»,- ասաց Նիկոլ Փաշինյանը՝ նշելով, որ ինքը դատապարտում է նաեւ մյուս քաղբանտարկյալների բանտում գտնվելը։
«Ժառանգություն» խմբակցության պատգամավոր Զարուհի Փոստանջյանը նույնպես միացավ Փաշինյանի կոչին․ «Երբ մարդկանց կողմից հայտարարվում է, որ իրենք պատրաստ են առաջնագիծ եւ ազատագրել մեր հայրենիքը, դրանից հետո կալանավորվում են նրանք, դա նշանակում է՝ կալանավորում են մեր հայրենիքն ազատագրողներին»։
Հիշեցնենք, որ հունիսի 23-ին Ժիրայր Սեֆիլյանը երկու ամսով կալանավորվեց: Նա դատարանում չի ընդունել իրեն առաջադրված մեղադրանքը՝ հայտարարելով, որ այն շինծու է։
Ժիրայր Սեֆիլյանին մեղադրանք է առաջադրվել ՀՀ քրեական օրենսգրքի 235-րդ հոդվածի 2-րդ մասով՝ Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը: