Եվրամիությունից Մեծ Բրիտանիայի դուրս գալը կարող է մեծ ազդեցություն ունենալ գլոբալ անվտանգության վրա, թուլացնել դաշինքի արտաքին ներուժը, ինչպես նաեւ փոփոխել Արեւմուտքի մոտեցումն այն խնդիրներին, որոնց բախվում է զորակազմը, գրում է The Wall Street Journal-ը:
Պարբերականի կարծիքով, Brexit-ն ամենայն հավանականությամբ կխարխլի եվրոպական երկրների միասնությունը հակառուսական պատժամիջոցների հարցում: WSJ-ն հիշեցնում է, որ պատժամիջոցները երկարաձգվել են եւս կես տարով, սակայն մի շարք երկրներ, ներառյալ Իտալիան, Իսպանիան եւ Հունաստանը, ձգտում են թուլացնել դրանք:
Նշվում է, որ Մեծ Բրիտանիան Գերմանիայի կանցլեր Անգելա Մերկելի կոշտ գծի ամենահավատարիմ կողմնակիցն էր պատժամիջոցների հարցում: Իսկ այժմ Մերկելը զրկվել է այդ դաշնակցից:
«Ամենամեծ հարվածին ենթարկվել են Ռուսաստանի դեմ պատժամիջոցները: Պատժամիջոցային քաղաքականությունը կթուլանա, որովհետեւ Բրիտանիայի ձայնն այնքան ուժեղ չի լինի, որքան մենք հույս ունեինք», — հայտնել է ՆԱՏՕ-ի նախկին պաշտոնյա Ֆաբրիս Պոտյեն:
Փորձագետները վախենում են, որ Brexit-ը կթուլացնի Եվրամիությունը արտաքին սպառնալիքներին դեմ-հանդիման: Համաեվրոպական ռազմական բյուջեում Բրիտանիայից միջոցների բացակայությունը կհարվածի դաշինքի պաշտպանունակությանը:
Նյութում ասվում է, որ մի շարք պաշտոնյաներ կարծում են, որ Brexit-ը կարող է նպաստել ՆԱՏՕ-ի ամրապնդմանը եւ այլ երկրների, մասնավորապես Գերմանիայի կողմից պաշտպանական ծախսերի ավելացմանը: Միաժամանակ այլ փորձագետներ կանխատեսում են, որ անվտանգության քաղաքականության հարցում ԵՄ-ը կարող է գնալ իր ճանապարհով եւ անցնել միասնական եվրոպական բանակի ստեղծմանը, ինչը դիտարկվում է որպես ՆՍՏՕ-ի խարխլում:
Բացի այդ, գրում է WSJ-ն, Brexit-ը կարող է մթագնել ԵՄ-ի եւ ՆԱՏՕ-ի առաջիկա գագաթնաժողովները: Արեւմուտքի համերաշխության ցուցադրության փոխարեն, հանդիպումները նվիրված կլինեն Եվրոպայում շրջադարձի քննարկմանը, հայտնում է Gazeta-ն: