«Գազպրոմ Արմենիա» ՓԲԸ աշխատակիցները hանդես են եկել «Հերոսի զավակը իմ զավակն է» նախաձեռնությամբ, որի շրջանակում ապրիլյան քառօրյա պատերազմում զոհված արցախցի հերոսների զավակները հյուրընկալվում են «Գազպրոմ Արմենիա» ՓԲԸ աշխատակիցների ընտանիքներում:
Ընկերությունից NEWS.am-ին հայտնում են, որ նախաձեռնության նպատակն է հերոսների պատանի զավակներին ժամանակավորապես լիցքաթափել հետպատերազմական մթնոլորտից, ծանոթացնել Հայաստանի պատմամշակութային վայրերի հետ, կազմակերպել ամառային հանգիստը, ինչպես նաեւ միջավայր ստեղծել որպեսզի հասակակից երեխաները մտերմանան միմյանց հետ եւ ընկերական կապեր հաստատեն:
Գրիգորը, Հայկը, Հարութը եւ Հրայրը մայոր Սուրեն Մելքումյանի որդիներն են:
Հադրութցի մայորը Արցախի Պաշտպանության բանակում ծառայում էր 1997թ.-ից: Ավարտելով Երեւանի Վազգեն Սարգսյանի անվան ռազմական ինստիտուտը, նորից վերադարձել էր Հադրութ՝ ծառայության անցնելու նպատակով: Մայոր Սուրեն Մելքումյանի ծառայությունները գնահատված են «Անբասիր ծառայության» 1-ին աստիճանի եւ ՀՀ ԶՈՒ 20-ամյակին նվիրված մեդալներով:
Սուրեն Մելքումյանը զոհվել է ապրլին, մարտական գործողությունների ժամանակ՝ անկատար թողնելով բազմաթիվ ծրագրեր եւ երազանքներ:
«Սուրենը 4 որդի ունի, միշտ ասում էր՝ դիրքեր եմ բարձրանում, որ երեխաներս ինձնով հպարտանան, պարծենան: Այդպես էլ եղավ. չորս որդիները պիտի միշտ իմանան, որ իրենց հայրը հերոսի մահով է ընկել», — պատմում են նրա ընկերները:
Արդեն մեկ շաբաթ է, ինչ Սուրենի չորս որդիները մոր՝ տիկին Արեւի հետ հյուրընկալվել են Արմավիրի ԳԳՄ-ի տնօրեն Սաշիկ Մկրտչյանի տանը եւ արդեն հասցրել են հարազատանալ այնքան, որ տանտիրոջը՝ Սաշիկ Մկրտչյանին դիմում են որպես հորեղբայր: Երեխաների առօրյան բավականին հագեցած է՝ էքսկուրսիաներ Էջմիածին, Խոր Վիրապ, այցելություններ ժամանցի վայրեր, խաղային ատրակցիոներ եւ այլն: Չորսամյա Հրայրի ամենասիրած զբաղմունքը հեծանիվն է, իսկ մեծ եղբայրները նախընտրում են լողավազանը: Մայրը՝ տիկին Արեւը նշում է, որ երեխաներին պետք է հատկապես ընտանեկան միջավայր, իսկ Մկրտչյանների համոզմամբ՝ երկու ընտանիքների շփումը խոստանում է դառնալ ավելի բարեկամական ու շարունակական:
Զուգադիպություն է, թե ճակատագրի խաղ, փոխգնդապետ Ռոման Պողոսյանը զոհվեց ապրիլի 2-ին մարտական ծառայության ժամանակ, հուղարկավորվեց իր ծննդյան օրը:
Ռոմանը ղեկավարել է զորամասի հրետանային բաժանմունքը` շարքային զինվորականից հասնելով փոխգնդապետի կոչման: 2015թ. ավարտել էր նաեւ ՌԴ Սանկտ Պետերբուրգի բարձրագույն զինվորական ակադեմիան` կարմիր դիպլոմով:
Ծառայության ընթացքում բազմիցս արժանացել է խրախուսման` պատվոգրերի, մեդալների: Նրա կուրծքը զարդարել են «Անբասիր ծառայության» 1-ին եւ 2-րդ աստիճանի, «Վ. Սարգսյանի անվան», ՀՀ Նախագահի կողմից ՀՀ ԶՈՒ 20-ամյակին նվիրված մեդալները:
Ռոմանը ընտանիքի օրինակելի հայր էր: Նրա զավակները՝ Անահիտը, Գագիկը եւ Գոռը, այս օրերին հյուրընկալվել են Արագածոտնի ԳԳՄ-ի տնօրեն Ռուբիկ Հայրապետյանի տանը: Ընտանիքի անդամների հետ անմիջական ու ջերմ շփումը, համատեղ զբոսանքներն ու ժամանցի կազմակերպումը լավ ու հաճելի հուշեր կթողեն ամառային արձակուրդներից: Անահիտն ու Շահանեն՝ Ռ. Հայրապետյանի թոռնուհին, արդեն ընկերուհիներ են. խոսում են իրենց հետաքրքրող թեմաներից, կիսվում են տպավորություններով ու կարծիքներով: Գագիկն ու Գոռը ունեն շատ նախասիրություններ, որոնց մասին սիրում են պատմել: Պատմում են նաեւ Ղարաբաղից, հայրենի Հադրութից: Հայրապետյանների ընտանիքի հոգատար ու բարյացակամ վերաբերմունքը ընտանեկան ջերմ մթնոլորտ է ստեղծել նրանց համար: