Նորածնին գնելու մեջ մեղադրվող Քրիստինե Կ.-ի ու գործով մյուս երկու մեղադրյալների՝ բուժքրոջ եւ բժշկուհու միջեւ տեղի է ունեցել առերեսում: Այս մասին NEWS.am-ի թղթակցին հայտնեց գնելու մեղադրվող կնոջ պաշտպանը՝ Վահան Հովհաննիսյանը:
«Քրիստինեի եւ մյուս բոլոր մեղադրյալների տված ցուցմունքներում առկա են հակասություններ, սակայն թե ինչպես քննիչը կորակի դրանք, չեմ կարող ասել: Քրեական գործի հարուցումից հետո իմ պաշտպանյալի եւ բուժքրոջ եւ բժշկուհու միջեւ առերեսում է եղել»,- ասաց Վահան Հովհաննիսյանը:
Նշենք, որ Քրիստինե Կ.-ին մեղադրանք է առաջադրվել Քրեական օրենսգրքի 168-րդ հոդվածի 1-ին մասով, այն է՝ խնամքը ստանձնելու նպատակով երեխայի առքը, որը նախատեսում է ազատազրկում՝ երկուսից հինգ տարի ժամկետով:
Հիշեցնենք, որ հունիսի 8-ին ձերբակալված բժշկուհի Կարինե Անտոնյանին եւ բուժքույր Գոհարիկ Խաչատրյանին քրեական գործի շրջանակներում մեղադրանք է առաջադրվել, նրանց նկատմամբ կալանավորումը որպես խափանման միջոց կիրառելու վերաբերյալ միջնորդություն է ներկայացվել դատարան, որը բավարարվել է: Մեղադրանք է առաջադրվել նաեւ նորածնին վաճառելու մեջ կասկածվող Ալլա Կարապետյանին: Նրա նկատմամբ որպես խափանման միջոց է ընտրվել ստորագրությունը չհեռանալու մասին:
Ավելի վաղ NEWS.am-ը հայտնել էր, որ 2016թ. ապրիլի 9-ին Արմավիրի մարզի բնակչուհիներից մեկն իր նորածնին 3 հազար ԱՄՆ դոլարի դիմաց վաճառել է իր նորածին երեխային Արարատի մարզի բնակչուհուն: Պարզվել է, որ Արարատի մարզի բնակչուհին եւս 2 հազար ԱՄՆ դոլար վճարել էր միջնորդին՝ Գոհարիկ Խաչատրյանին: