ԵՄ-ից Բրիտանիայի դուրս գալու մասին հանրաքվեին հաջորդող սակարկությունների երկու օրերին աշխարհի ֆոնդային բորսաները կորցրել են ռեկորդային 3 տրլն դոլար: Հանրաքվեն աշխարհի առաջատար առևտրային հարթակներում աժիոտաժային վաճառքի պատճառ է դարձել, գրում է բրիտանական Financial Times–ը՝ վկայակոչելով շուկայի մասնակիցներին:
Բորսային վերլուծաբանները նշում են, որ սակարկությունների առաջին օրը առևտրի հարթակներում անկումը պայմանավորված էր կարճաժամկետ դիրքերի վաճառքով, որոնց հաշվին ներդրողները ուզում էին գումար վաստակել, քանի որ մեծամասնությունը վստահ էր, որ բրիտանացիները կքվեարկեն ԵՄ-ին անդամակցությունը պահպանելու օգտին: Հանրաքվեի անսպասելի արդյունքը հանգեցրել է կարճ դիրքերի ռեկորդային վաճառքի, ինչն էլ հենց աժիոտաժային անկման պատճառ է դարձել: Իսկ հանրաքվեից հետո երկրորդ առևտրային օրն արդեն սակարկությունների այլ տրամաբանություն էր գործում: Ներդրողները վերանայում էին իրենց վերաբերմունքը երկարաժամկետ ներդրումներին ու ազատվում ռիսկային ակտիվներից, հայտնում է Gazeta–ն:
«Ներդրողներից քչերն էին կարծում, որ հանրաքվեի արդյունքներն այսպիսին կլինեն»,- նշում է Convergex–ի գլխավոր ստրատեգ Նիկոլաս Կոլասը:
S&P Global Broad Market index (BMI) համաշխարհային գործակիցը երկու օրում 6.9 տոկոսով անկում է ապրել, ինչը հակառեկորդ է՝ 2008-ի նոյեմբերից առայսօր: Ընդհանուր առմամբ զարգացած շուկաներից այս երկու օրերին դուրս է բերել մոտ 2.8 տրլն դոլար, մինչդեռ զարգացող շուկաներից՝ մոր 179 մլն դոլար: Վերլուծաբանները նշում են, որ ներդրողները դեռ չեն կարող կանխատեսել կայունացում, քանի որ հանրաքվեի կապակցությամբ շատ բարձր է անորոշության մակարդակը:
Մեծ Բրիտանիայում ԵՄ կազմից երկրի դուրս գալու վերաբերյալ հանրաքվեն անցել է հունիսի 23-ին: ԵՄ-ից դուրս գալուն կողմ են քվեարկել 51.9 տոկոսը, իսկ դեմ՝ 48.1 տոկոսը: Հյուսիսային Իռլանդիայի ու Շոտլանդիաայի քաղաքացիներն էլ իրենց հերթին կողմ են արտահայտվել ԵՄ կազմում Բրիտանիայի պահպանմանը: