Շուշիի առանձնակի գումարտակի հրամանատար, «Հիմնադիր խորհրդարանի» անդամ Ժիրայր Սեֆիլյանի գործով կալանավորված 8 քաղաքացիներից Ներսես Պողոսյանն իրեն առաջադրված մեղադրանքը չի ընդունում եւ այն շինծու է համարում: Այս մասին այսօր՝ հունիսի 28-ին, NEWS.am-ի հետ զրույցում ասաց նրա փաստաբան Արայիկ Պապիկյանը: Նա նշեց, որ իր պաշտպանյալն ընդհանրապես ցուցմունքի չի տվել, հրաժարվել է առերեսումից եւ հարցաքննությունից:
«Շինծու մեղադրանք է առաջադրված եւ ինքը դա չի ընդունում միանշանակ: Պաշտպանյալս ընդհանրապես ցուցմունք չի տվել որեւէ մեկի դեմ կամ ինչ-որ բանի վերաբերյալ: Իսկ առերեսումն անհասկանալի էր, առերեսման են ներկայացրել գործով մեղադրյալներից մեկի հետ, բայց հրաժարվել է »,-ասաց նա:
Արայիկ Պապիկյանը նշեց, որ իր պաշտպանյալը հասարակական ակտիվ դիրքորոշում է ունեցել, մասնակցել է տարբեր հավաքների եւ չի բացառվում, որ որեւէ հանրահավաքի ժամանակ հանդիպած լինի ԺիրայրՍեֆիլյանի հետ, սակայն, այն, ինչի մեջ մեղադրում են Ներսեսին, իրականության հետ ընդհանրապես կապ չունի: Փաստաբանի խոսքով, գործով կալանավորված մյուս քաղաքացիներից մարդ կա, որին ճանաչում է Ներսեսը, բայց կան մարդիկ, որոնց ընդհանրապես չի տեսել եւ չի ճանաչում:
«Նրան մայիսի 30-ին են ձերբակալել, իսկ հուլիսի 2-ին կալանավորել են: Կալանավորելու որոշումը բողոքարկել ենք, սակայն, մերժել են: Նա ամուսնացած է, երեք երեխաներ ունի անչափահաս, ընտանիքի միակ խնամք իրականացնողն հենց ինքն էր, այլ եկամուտի աղբյուր չունեն, բացի նպաստից: Ես դիմեցի վարույթն իրականացնող մարմնին, որ ընտանիքի խնամքը պետությունը վերցնի, բայց մերժեցին: Այսինքն՝ միայն նպաստով են ապրում, բայց, ըստ նախաքննական մարմնի՝ նրա ընտանիքը խնամքի կարիք չունի»,-ասաց նա:
Հիշեցնենք, որ հունիսի 23-ին Ժիրայր Սեֆիլյանը երկու ամսով կալանավորվեց: Նա դատարանում չի ընդունել իրեն առաջադրված մեղադրանքը՝ հայտարարելով, որ այն շինծու է։
Ժիրայր Սեֆիլյանին մեղադրանք է առաջադրվել ՀՀ քրեական օրենսգրքի 235-րդ հոդվածի 2-րդ մասով՝ Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը:
Այս քրեական գործի շրջանակներում որպես մեղադրյալ է ներգրավվել 9 անձ, որոնց թվում՝ Ժիրայր Սեֆիլյանը։ Մեղադրյալներից մեկի գտնվելու վայրն անհայտ է, եւ նրա նկատմամբ հայտարարվել է հետախուզում, հանձնարարություն տրվել համապատասխան մարմիններին միջոցներ ձեռնարկել՝ նրան հայտնաբերելու եւ վարույթն իրականացնող մարմնին ներկայացնելու ուղղությամբ։