Մեծ Բրիտանիայի Լեյբորիստական կուսակցությունից խորհրդարանի պատգամավոր Փեթ Գլասսը չի մասնակցել Brexit-ի հարցով հանրաքվեին՝ իր կյանքի դեմ սպառնալիքների պատճառով: Այս մասին գրում է ՌԻԱ Նովոստին՝ վկայակոչելով BBC-ն:
Գլասսը ԵՄ-ին անդամակցությունը պահպանելու կողմնակից էր: Պատգամավորի խոսքով, ոստիկանությունն իրեն խորհուրդ է տվել «խուսափել հրապարակային վայրերից»: Սակայն հստակ հրահանգ չի եղել այն մասին, որ հարկավոր է քվեարկության չգնալ: Ներկայում իրավապահները հետաքննում են գործի շրջանակում ստացած տվյալները:
Հիշեցնենք, որ հունիսի 23-ին Մեծ Բրիտանիայում Եվրամիության անդամակցության շուրջ հանրաքվե անցկացվեց: Պաշտոնական արդյունքների համաձայն, ԵՄ կազմից դուրս գալու օգտին քվեարկել է հանրաքվեին մասնակցած քաղաքացիների 51.9%-ը: