Տեղեկատվական տեխնոլոգիաների ձեռնարկությունների հետ համագործակցությունը փորձում ենք ընդլայնել: Այս մասին այսօր՝ հունիսի 29-ին, «Եռաբլուր» զինվորական պանթեոնում լրագրողների հետ զրույցում ասաց Հայաստանի պաշտպանության նախարար Սեյրան Օհանյանը:
«Առաջին քայլերը տարիներ շարունակ իրականացվում են, հիմա մենք փորձում ենք ընդլայնել համագործակցությունը: Պաշտպանության նախարարի նոր տեղակալ է նշանակվել Դավիթ Փախչանյանը, որը նաեւ ռազմական արդյունաբերության պետական կոմիտեի նախագահն է. նա այս ոլորտի հետ լուրջ առնչություն ունի, լուրջ գիտելիքներ, ունակություններ ունի եւ այդ ոլորտի հետ համագործակցությունը շարունակելու ենք»,- ասաց Սեյրան Օհանյանը:
Հիշեցնենք, որ քառօրյա պատերազմից հետո պարզ դարձավ, որ Պաշտպանության նախարարությունը տարիներ շարունակ չի համագործակցել հայկական ընկերությունների հետ, որոնք տարբեր նորարարական մեթոդներ եւ սարքեր են առաջարկում՝ առաջին հերթին առաջնագծում կիրառելու համար: Ապրիլի վերջին ՏՏ ոլորտի մասնագետների եւ ՊՆ աշխատակիցների հանձնաժողով է ստեղծվել՝ պարզելու համար, թե ՏՏ ոլորտի նորարարություններն ինչքանով են կիրառելի հայոց բանակում:
