Եթե Եվրասիական տնտեսական միությանն անդամակցությունը չլիներ, Հայաստանի վիճակը կլիներ ավելի վատ: Այս մասին այսօր՝ հունիսի 29-ին, լրագրողներ հետ զրույցում նշել է ՀՀ փոխվարչապետ Վաչե Գաբրիելյանը:
Դիտարկմանը, որ ԵՏՄ անդամակցության 2 տարիների ընթացքում կազմակերպության անդամ երկրների միջեւ առեւտուրը կրճատվում է, արդյոք կարելի է պնդել, որ այս պահի դրությամբ ԵՏՄ անդամակցությունն իրեն չի արդարացրել, Գաբրիելյանը պատասխանեց. «Ոչ, չենք կարող ասել, որովհետեւ այն ազդեցությունն ու տնտեսական գործոնը, որ ունի ԵՏՄ-ն, մասնավորապես՝ էներգակիրների գների նվազումը, դրա հետ կապված՝ բնակչության եկամուտներն ամբողջ տարածքում եւ ԵՏՄ սպառման նվազումը, եւ մեր ներքին սպառման նվազման գործոնները, ինչպես նաեւ դրա հետ կապված փոխանցումների նվազումը, անկախ դրանից՝ մենք լինենք ԵՏՄ-ի մեջ կամ չլինեինք, միեւնույնն է՝ դա ազդելու էր Հայաստանի Հանրապետության վրա: Այն փաստի շնորհիվ, որ մենք մտել ենք ԵՏՄ, այդ ազդեցությունը թուլացել է»:
Նա խոստովանեց, որ ԵՏՄ անդամ դառնալիս ավելի բարձր սպասելիքներ են ունեցել, սակայն միջազգային տնտեսության մեջ ի հայտ եկած օբյեկտիվ պատճառներով դրանք իրականություն չեն դարձել:
Անդրադառնալով կոռուպցիայի դեմ պայքարին, փոխվարչապետը նշեց, որ այդ հարցում թեեւ դանդաղ, բայց տեսանելի առաջընթաց կա: Նրա խոսքով, իրենք միջազգային կազմակերպությունների 4 անկախ փորձագետների են ներգրավել կոռուպցիայի դեմ պայքարում, որոնք պետք է վեր հանեն կրթության, հարկային մարմինների, ոստիկանության եւ առողջապահության ոլորտի ախտերը եւ առաջարկեն դրանց լուծումները: