Վրաստանի վարչապետի` Ռուսաստանի հետ հարաբերությունների կարգավորման հարցերով հատուկ ներկայացուցիչ Զուրաբ Աբաշիձեն Ստամբուլից Թբիլիսի է թռել առաջին պայթյունից 15 րոպե առաջ, հայտնում է «Ռուսթավի-2» հեռուստաընկերությունը:
Երեքշաբթի մոտ 22:00-ին Ստամբուլում Աթաթուրքի անվան օդանավակայանի մուտքի, ելքի եւ կայանատեղիի մոտ որոտացած պայթյունները 36 մարդու կյանք են խլել, եւս 147-ը վնասվածքներ են ստացել:
«Երբ մենք Վրաստան ժամանեցինք, այդ ժամանակ իմացանք դրա մասին: Ինձ զանգեցին, իսկ հետո ես հաշվարկեցի, որ պայթյունը տեղի է ունեցել մեր օդ բարձրանալուց մի քանի րոպե անց», — պատմել է Աբաշիձեն Թբիլիսիի օդանավակայան հասնելով:
Վրաստանի ԱԳՆ-ն ավելի վաղ հայտնել էր, որ Ստամբուլի օդանավակայանում զոհվածների եւ տուժածների շրջանում Վրաստանի քաղաքացիներ չկան, չնայած երկու տուժածի մասին տեղեկությունը տարածվել էր գիշերը: Այդ դեպքի պաշտոնական հաստատումներ դեռ չկան:
Ստամբուլում Վրաստանի գլխավոր հյուպատոսարանը մշտական կապի մեջ է Թուրքիայի արտակարգ իրավիճակների առաջին արձագանքման խմբի հետ:
Պայթյունների ընթացքում օդանավակայանում Վրաստանի քաղաքացիներ են եղել, որոնց հանդիպել է գլխավոր հյուպատոսը: Մի մասը գիշերը լքել է տարածքը: Նրանց տեղավորել են հյուրանոցներում, հայտնել է հեռուստաընկերությունը: