Ստամբուլի Աթաթուրքի անվան օդանավակայանում հունիսի 28-ի ուշ երեկոյան տեղի ունեցած ահաբեկչությունը վերջին մի քանի ամիսների ընթացքում Թուրքիայում տեղի ունեցած ահաբեկչական գործողություններից ամենամեծն էր: Այս մասին այսօր՝ հունիսի 29-ին, NEWS.am-ի հետ զրույցում ասաց «Ժամանակ¦ պարբերականի խմբագիր Արա Գոչունյանը: Նա նշեց, որ վերջին շրջանում միայն Ստամբուլում տեղի ունեցած ահաբեկչությունների հետեւանքով արդեն հարյուրավոր զոհեր կան, Թուրքիայում բարդ շրջան է եւ թուրք հասարակությունը ահաբեկված է.
«Ստամբուլում սարսափելի գիշերվանից հետո հասարակությունն ահաբեկված է, Թուրքիայի տարբեր շրջաններում ամեն օր ահաբեկչական գործողություններ են տեղի ունենում, իրավապահ մարմիններն անընդհատ գործողություններ են ձեռնարկում իրավիճակը վերահսկելու համար, սակայն, տեսնում ենք, որ Թուրքիայի համար շատ բարդ շրջան է»,-ասաց Արա Գոչունյանը:
Նա նշեց, որ Աթաթուրքի անվան օդանավակայանի գործունեությունն արդեն բնականոն հունի է վերադարձել եւ Թուրքիայի իշխանություններն արդեն հայտարարել են, որ կասկածներ կան, որ «Իսլամական պետությունն» է ահաբեկչության հեղինակը:
Հիշեցնենք, որ Ստամբուլի Աթաթուրքի անվան օդանավակայանում հունիսի 28–ի ուշ երեկոյան իրականացված ահաբեկչության հետեւանքով սպանվածների թիվը հասել է 41–ի, իսկ վիրավորների թիվը՝ 239–ի, իսկ 41 սպանվածներից 13-ը այլ երկրների քաղաքացիներ են։