Ազգային ժողովի ՕԵԿ խմբակցության ղեկավար Հեղինե Բիշարյանն իրենց կուսակցությանը քննադատած Նիկոլ Փաշինյանին առաջարկում է «ռազբորկայի» միջոցով լուծել հարցը:
«Այն Ընտրական օրենսգիրքը, որի շուրջ քննարկում եղավ այստեղ, որտեղ եղավ հորդոր, որ մի քննադատեք այն քաղաքական ուժերին, որոնք ամիսներ շարունակ աշխատել են, որ ոչ մի քվե չկորի: Հանկարծ երկնքից իջնում են մարդիկ, որոնք սկսում են խոսել Ընտրական օրենսգքրի շուրջ աշխատանքի մասին, տալիս են գնահատականներ, որի իրավունքը չունեն»,- այսօր՝ հունիսի 29-ին, Ազգային ժողովում ասաց Հեղինե Բիշարյանը՝ անդրադառնալով Նիկոլ Փաշինյանի հայտարարությանը:
Հեղինե Բիշարյանի խոսքով՝ «Մարտի 1»-ի ողջ պատասխանատվությունն ընկած է Փաշինյանի վրա, քանի որ «տասնյակ հազարավոր մարդկանց մոլորեցնելով տարել է զոհաբերության եւ հանգիստ գնացել տուն»:
«Դուք ձեր քթին ուտելու եք։ Մարտի 1-ի արյունն այսօր միանշանակ ձեր վրա է, կոնկրետ քո վրա է։ Տասնյակ հազարավոր մարդկանց մոլորեցնելով՝ տարաք զոհաբերության և խիղճներդ հանգիստ նստեցիք ձեր տանը, իսկ այսօր փորձում եք մարդ գտնել, որոնց վրա կդնեք այդ պատասխանատվությունը: Եթե չափվելու տեղ եք ուզում, եկեք դահլիճից դուրս։ Եթե շատ ուժեղ տղերք եք, եկեք տղայական ռազբորկի»,- ասաց խմբակցության ղեկավարը:
Նշենք, որ Նիկոլ Փաշինյանն այսօր քննադատել է ՕԵԿ-ին, ՀԱԿ-ին ու ՕԵԿ-ին, որոնց ներկայացուցիչները նախորդ օրերին բուռն քննադատության էին ենթարկել իրեն: