Աշխատանքային այցով Վաշինգթոնում գտնվող «Համախմբում» կուսակցության նախագահ Վարդան Օսկանյանը հունիսի 29-ին պետդեպարտամենտում հանդիպում է ունեցել Մինսկի խմբի ամերիկացի համանախագահ Ջեյմս Ուորլիքի հետ։

«Համախմբում» կուսակցությունից NEWS.am-ին հայտնում են, որ հանդիպման ընթացքում քննարկվել են Լեռնային Ղարաբաղի շուրջ բանակցությունների նոր փուլին առնչվող հարցերը եւ հնարավոր զարգացումները։

Օսկանյանն իր գնահատկանն է տվել 4-օրյա պատերազմի դրդապատճառներին եւ դրանից հետո ստեղծված իրավիճակին, ինչպես նաեւ՝ ներկայացրել իր տեսակետները նոր իրավիճակում հակամարտության կարգավորման վերաբերյալ:

Մինչեւ այդ հանդիպումը՝ հունիսի 28-ին, Օսկանյանը հանդիպել էր Սենատի Արտաքին հարաբերությունների հանձնաժողովի օրենսդրական հարցերով օգնական Բրիթանի Բեյլոյի հետ, որի ընթացքում, ի լրումն արտաքին հարաբերություններին առնչվող հարցերի, խոսվել է Հայաստանի ներքաղաքական զարգացումների մասին:

Առաջիկայում Վարդան Օսկանյանը հանդիպումներ կունենա նաեւ հայ համայնքի ներկայացուցիչների հետ։