ԵԱՀԿ գործող նախագահ եւ Գերմանիայի արտաքին գործերի նախարար Ֆրանկ-Վալտեր Շտայնմայերը, Հարավային Կովկասի երեք երկրներ իր պաշտոնական այցի շրջանակներում գտնվելով Հայաստանում, այսօր այցելեց ԵԱՀԿ երեւանյան գրասենյակ՝ քննարկելու վերջինիս աշխատանքն ու գործունեությունը եւ հանդիպելու քաղաքացիական հասարակության ներկայացուցիչների հետ։
Շտայնմայերին ողջունեց ԵԱՀԿ երեւանյան գրասենյակի ղեկավար, դեսպան Արգո Ավակովը։
«ԵԱՀԿ երեւանյան գրասենյակը սերտորեն համագործակցում է Հայաստանում պետական կառույցների ու քաղաքացիական հասարակության հետ եւ ողջունում է գործող նախագահի այս այցը: Քաղաքացիական հասարակությունը կարեւոր դերակատարում ունի Հայաստանում ընտրական գործընթացի նկատմամբ հանրային վստահության բարձրացման, ոստիկանություն-հասարակություն գործընկերության բարելավման, ինչպես նաեւ կանանց ու երիտասարդության ներգրավվածության եւ զանգվածային լրատվամիջոցների ազատության խթանման գործում»,- ասել է Ավակովը։
Գործող նախագահն իր գնահատանքն է հայտնել բոլոր երեք հարթություններում գրասենյակի գործունեության վերաբերյալ եւ գովել սերտ համագործակցությունը Հայաստանի հաստատությունների հետ:
Ավելի վաղ, Հայաստան կատարած իր այցի առաջին օրը՝ հունիսի 29-ին, Շթայնմայերը հանդիպումներ է ունեցել երկրի նախագահ Սերժ Սարգսյանի եւ Արտաքին գործերի նախարար Էդվարդ Նալբանդյանի հետ:
ԵԱՀԿ երեւանյան գրասենյակը սերտորեն համագործակցում է պետական գործընկերների, քաղաքացիական հասարակության եւ Հայաստանում այլ դերակատարների հետ՝ աջակցելու գործունեությանը տարբեր ոլորտներում, ներառյալ՝ օրենսդրական եւ քրեական արդարադատության արեփոխումներ, պայքար կոռուպցիայի դեմ, միգրացիոն քաղաքականություն, տնտեսական ինտեգրում, բնապահպանական գործունեություն, մարդու իրավունքների վերաբերյալ իրազեկվածության բարձրացում, լրատվամիջոցների ազատություն, տեղեկատվության հասանելիություն, գենդերային հավասարություն, աջակցություն ոստիկանության եւ անվտանգության ոլորտի բարեփոխմանը: