ՀՀ ոստիկանության նախկին ծառայող, ՀՀ արդարադատության նախարարության «Վարդաշեն» քրեակատարողական հիմնարկի կալանավոր Զոհրաբ Ա.-ն հայտնել է պետական հատուկ ծառայություն իրականացնող պաշտոնատար անձանց կողմից առերևույթ բռնության գործադրմամբ զուգորդված պաշտոնեական լիազորություններն անցնելու վերաբերյալ տվյալներ:
ՀՔԾ-ից NEWS.am-ին հայտնում են, որ մասնավորապես՝ Զոհրաբ Ա.-ն հաղորդում է տվել այն մասին, որ 2016 թվականի հունիսի 6-ին գողություն կատարելու կասկածանքով իրեն տեղափոխել են ՀՀ ոստիկանության Կոտայքի բաժին, որտեղ ոստիկանության հիշյալ բաժնի ծառայողները բռնություն են կիրառել իր նկատմամբ՝ ստիպելով խոստովանել իր կողմից իրականում չկատարված 62 գողություններ կատարելու հանգամանքը:
Քաղաքացի Զոհրաբ Ա.-ի հաղորդման հիման վրա՝ պետական հատուկ ծառայություն իրականացնող պաշտոնատար անձանց կողմից բռնության գործադրմամբ զուգորդված պաշտոնեական լիազորություններն անցնելու դեպքի առթիվ ՀՀ հատուկ քննչական ծառայությունում ՀՀ քրեական օրենսգրքի 309-րդ հոդվածի 2-րդ մասի հատկանիշներով հարուցվել է քրեական գործ:
Կատարվում է նախաքննություն:
