Էյֆելյան աշտարակը հունիսի 30-ի երեկոյան կլուսավորվի թուրքական դրոշի գույներով՝ Ստամբուլի օդանավակայանում կատարված ահաբեկչության 42 զոհերի հիշատակին, հայտնել է Փարիզի քաղաքապետարանը, փոխանցում է «ՌԻԱ Նովոստին»:
Փարիզի քաղաքապետի առաջին տեղակալ Բրյունո Ժյուլյարը հայտնել է, որ Փարիզի խորհրդանիշը կլուսավորվի կարմիր ու սպիտակ գույներով, որպեսզի «հիշեցնի զոհերին, նրանց հարազատներին ու ամբողջ թուրք ժողովրդին Փարիզի աջակցության մասին»:
Ստամբուլի Ատաթուրքի անվան օդանավակայանի մուտքի, ելքի մոտ ու ավտոկայանատեղիում հունիսի 28-ին երեք պայթյուն է եղել: Վերջին տվյալներով ահաբեկչության հետեւանքով զոհվել է 42 մարդ, այդ թվում 13 օտարերկրացի, 239-ը վիրավոր կա: Թուրքիայի վարչապետ Բինալի Յըլդըրըմը հայտնել է, որ հավաքված ապացույցները վկայում են այն մասին, որ ահաբեկչությունը ԻՊ խմբավորումն է կազմակերպել: