Հայոց ցեղասպանության ճանաչումը բավական ցավոտ հարց է եւ գտնվում է հետազոտման փուլում: Այդ թեման չի ուսումնասիրվել եւ եթե համապատասխան դիմում լինի, մենք այն կուսումնասիրենք: Այդ մասին լրագրողների հետ զրույցում հոկտեմբերի 6-ին հայտնել է Հայաստանում Բելառուսի դեսպան Ստեպան Սուխորենկոն՝ պատասխանելով հարցին, թե ինչո՞ւ Մինսկը չի ընդունում Հայոց ցեղասպանությունը դատապարտող բանաձեւ:
Նա նշել է նաեւ, որ Բելառուսի եւ Թուրքիայի հարաբերությունները խոչընդոտ չեն Ցեղասպանության ճանաչման հարցում. «Չեմ կարծում, թե Թուրքիան մեզ ավելի մոտ է, քան Հայաստանը: Այսօրվա դրությամբ, Բելառուսը սերտագույն հարաբերություններ ունի Հայաստանի հետ, եւ շփումների մակարդակը վկայում է, որ եղբայրական հայ ժողովուրդը մեզ շատ ավելի մոտ է: Մենք այսօր լավ հարաբերություններ ունենք Թուրքիայի հետ, բայց դրանք եղբայրական ասել չի կարելի: Հայոց ցեղասպանության ճանաչման հարցը պետք է լուծվի քաղաքական գործիչների մակարդակով, դա մեր խորհրդարանի իրավասության ներքո է: Այդ հարցը բավական լուրջ քննարկման առարկա է: Եթե համապատասխան դիմում լինի, մենք այն կուսումնասիրենք»:
